“Ubuzima bwanjye bumeze neza” – Papa Leo XIV nyuma yo kubagwa kanseri
Umushumba wa Kiliziya Gatolika ku Isi, Papa Leo XIV, yatangaje ko ubuzima bwe bumeze neza nyuma y’ibyumweru bitatu abazwe kanseri y’ibihaha, ubwo yatangizaga urugendo rw’iminsi 12 mu bihugu byo muri Amerika y’Epfo.
Papa Leo XIV w’imyaka 71 yatangaje ibi ubwo yari mu ndege imwerekeza muri Uruguay, ku wa Gatanu, tariki ya 6 Ugushyingo 2026, aho yatangiriye urugendo ruzamugeza no muri Argentine na Peru.
Papa Leo XIV yabwiye abanyamakuru bari kumwe na we ko yishimiye kuba yarashoboye gukora uru rugendo, nyuma y’uko mu Ukwakira hari havutse impungenge ku buzima bwe ubwo abaganga bamusangagamo ikibyimba cya kanseri mu bihaha.
Yagize ati: “Ndashimira cyane abaganga bitangiye kunyitaho. Nizera ko ubuzima bwanjye bumeze neza.”
Yakomeje avuga ko kuva ku munsi wa mbere atigeze ashidikanya ku kuba uru rugendo ruzaba, kuko yari afite icyizere ko azashobora kurukora.
Ku wa 13 Ukwakira 2026, Papa Leo XIV yabazwe ikibyimba cyari mu gice cy’ibihaha bye, nyuma y’uko abaganga bagisanzemo kanseri. Iki gikorwa cyo kubagwa cyagenze neza, abaganga batangaza ko kanseri itakwirakwiriye mu bindi bice by’umubiri.
Ubwo yageraga mu Mujyi wa Montevideo muri Uruguay, Papa Leo XIV yakiriwe n’imbaga y’abaturage bari baje kumuramukanya, bamwe bamugaragariza ibyishimo ubwo yanyuraga mu mihanda ari mu modoka yihariye ikoreshwa na Papa.
Mu ijambo rye rya mbere muri uru rugendo, yavugiye ahitwa Plaza Independencia, agaragaza ko serivisi z’ubuvuzi zikwiye kugera kuri buri wese, atitaye ku bushobozi bw’amafaranga afite.
Yavuze ko uburyo yitaweho n’abaganga bwatumye atekereza ku bantu benshi batabona ubushobozi bwo kwisuzumisha hakiri kare cyangwa kwivuza igihe barwaye.
Nyuma y’ibi bikorwa, Papa Leo XIV yagiye gusengera muri Katedrali ya Montevideo.
Biteganyijwe ko ku Cyumweru, tariki ya 8 Ugushyingo 2026, azakomereza urugendo muri Argentine, igihugu cy’amavuko cya Papa Fransisko wamubanjirije, ariko akaba atarakigezeho mu gihe cyose yamaze ayobora Kiliziya Gatolika.
Azanasura Peru, igihugu yamazemo imyaka myinshi akora umurimo w’iyogezabutumwa ndetse aza no kukibamo Musenyeri, mbere yo gutorerwa kuyobora Kiliziya Gatolika.
Vatikani yasobanuye ko gusubira muri Peru ari nk’ugutaha kuri Papa Leo XIV, kuko ari igihugu afitanye na cyo amateka akomeye mu murimo we wa gishumba.
Uru rugendo ruzasozwa ku wa 17 Ugushyingo 2026, rukaba rugamije kwegera abakirisitu, kubakomeza mu kwemera no kubagezaho ubutumwa bw’icyizere.