Amafoto yo mu kirere agaragaza aho imirimo yo kubaka urugomero rwa Nyabarongo II igeze
Ikigo cy’u Rwanda gishinzwe Ingufu (REG) cyagaragaje amafoto yafatiwe mu kirere yerekana aho imirimo yo kubaka urugomero rw’amashanyarazi rwa Nyabarongo II igeze, rukaba rwitezweho kongera megawati 43,5 ku bushobozi bw’u Rwanda bwo gutunganya amashanyarazi.
Mu butumwa REG yashyize ku rubuga nkoranyambaga rwa X kuri uyu wa Mbere tariki ya 2 Ugushyingo 2026, yagaragaje ko imirimo yo kubaka uru rugomero ikomeje, abakozi bakaba bakora amanywa n’ijoro kugira ngo uyu mushinga urangire.
REG yasobanuye ko uru rugomero ari umwe mu mishinga ikomeye igamije kongera ubushobozi bw’u Rwanda bwo gutunganya amashanyarazi, bityo rukazagira uruhare mu guteza imbere ibikorwa by’ubukungu n’imibereho y’abaturage.
Urugomero rwa Nyabarongo II rwubakwa ku ruzi rwa Nyabarongo, mu gace gahuza uturere twa Gakenke na Kamonyi, rukaba ruri mu mishinga minini ya Leta y’u Rwanda igamije kongera ingufu z’amashanyarazi aturuka ku mazi.
Imirimo yo kubaka uru rugomero yatangijwe ku mugaragaro ku wa 21 Gicurasi 2022, ikorwa na sosiyete y’Abashinwa ya Sinohydro.
Mu makuru REG yatangaje muri Kanama 2026, yagaragaje ko imirimo yo kubaka uru rugomero yari igeze kuri 73,1%, ndetse ko hateganywaga ko izarangira bitarenze Ukuboza 2027, mu gihe nta zindi mbogamizi zivutse.
Icyo gihe, Umuyobozi Mukuru wa REG, Eng. Maximilien Byilingiro, yasuye ahari kubakwa uru rugomero, asaba sosiyete irwubaka n’abashinzwe gukurikirana umushinga kongera imbaraga kugira ngo imirimo irangire mu gihe cyateganyijwe.
Uretse gutanga amashanyarazi, umushinga wa Nyabarongo II unateganyijwe kugira uruhare mu kugabanya ingaruka z’imyuzure mu bice bikikije uruzi rwa Nyabarongo, gufasha ibikorwa byo kuhira imyaka no guteza imbere imicungire y’amazi.
Biteganyijwe ko amashanyarazi azajya atunganyirizwa kuri uru rugomero azanyuzwa ku murongo w’amashanyarazi wa kilometero 19,2, akagezwa ku muyoboro mugari w’amashanyarazi w’igihugu hifashishijwe sitasiyo ya Rulindo.
Uru rugomero nirumara kuzura, ruzafasha kongera ingano y’amashanyarazi akorerwa mu gihugu, mu gihe u Rwanda rukomeje gushora imari mu bikorwa remezo by’ingufu hagamijwe kwagura ibikorwa by’inganda, ubucuruzi no kugeza amashanyarazi ku baturage.