Brig Gen Karuretwa yasabye abakozi ba Leta gushyira umuturage ku isonga mu gutanga serivisi
Umuvugizi w’Ingabo z’u Rwanda (RDF), Brig Gen Patrick Karuretwa, yasabye abakozi ba Leta gushyira imbere inyungu z’abaturage mu nshingano zabo za buri munsi, ashimangira ko kugera ku ntego z’Icyerekezo 2050 bisaba abakozi bashobora guhindura gahunda z’Igihugu ibikorwa bifatika bigirira abaturage akamaro.
Yabigarutseho ku wa Kabiri, tariki ya 27 Ukwakira 2026, mu kiganiro yahaye abitabiriye gahunda y’amahugurwa y’abakozi ba Leta bashya, National Induction Programme (NIP), ibera mu Kigo cy’Amahugurwa ya Gisirikare cya Gabiro, mu Karere ka Gatsibo.
Brig Gen Karuretwa, usanzwe ari Umuyobozi Mukuru ushinzwe Ubutwererane Mpuzamahanga mu bya Gisirikare, yatanze ikiganiro cyari gifite insanganyamatsiko igira iti: “From National Vision to Public Purpose”, igamije kugaragaza uko icyerekezo cy’Igihugu kigomba gushyirwa mu bikorwa binyuze muri politiki, gahunda n’ibyemezo bizamura imibereho y’abaturage.
Yagaragaje ko abakozi ba Leta bafite uruhare rukomeye mu iterambere ry’Igihugu, kuko ari bo bashyira mu bikorwa gahunda zashyizweho hagamijwe guteza imbere imibereho y’Abanyarwanda.
Yagize ati: “Abakozi ba Leta ni bo shingiro ryo guhindura icyerekezo ibikorwa bifatika. Hatariho abakozi ba Leta, Icyerekezo 2050 cyaba inyandiko nziza gusa ibitswe ku kabati.”
Yakomeje asobanura ko Icyerekezo 2050 kitagarukira gusa ku kongera ubushobozi bw’ubukungu, ahubwo kigamije no kuzamura imibereho y’abaturage mu buryo bwagutse.
Yagize ati: “Icyerekezo 2050 ntikireba amafaranga umuntu yinjiza gusa. Intego yacyo ya kabiri ni imibereho myiza kuri buri Munyarwanda: kuramba no kugira ubuzima bwiza, akazi keza, inzu igezweho, umutekano na serivisi zisanga umuturage aho kugira ngo abe ari we uzirukaho.”
Brig Gen Karuretwa yasabye abitabiriye aya mahugurwa kumva ko inshingano zabo zitagarukira gusa ku kazi bakora buri munsi, ahubwo ko zigomba kugira uruhare rugaragara mu kugera ku ntego z’Igihugu.
Yashimangiye ko intsinzi y’u Rwanda ishingiye ku bushake bw’abakozi ba Leta bwo gukorera abaturage, ubushobozi bwo guhuza imikorere yabo n’ibikenewe muri sosiyete ndetse no gufata ibyemezo bifitiye abaturage akamaro.
Yifashishije urugero rw’Ingabo z’u Rwanda, asobanura ko Gahunda ya Kabiri y’Igihugu yo Kwihutisha Iterambere (NST2) ishyira amahoro n’umutekano mu nkingi y’imiyoborere igamije impinduka, nubwo inshingano y’ibanze y’Ingabo ari ukurinda ubusugire n’umutekano by’Igihugu.
Yavuze ko RDF yumva ko, uretse kurinda Igihugu, ifite n’inshingano zagutse zo gukorera Abanyarwanda.
Muri urwo rwego, yagarutse kuri gahunda ngarukamwaka y’Ingabo n’inzego z’umutekano yo gufasha abaturage mu bikorwa by’iterambere, aho abasirikare, abaganga n’abahanga mu bwubatsi bakorana n’inzego z’ibanze mu bikorwa bigamije kuzamura imibereho y’abaturage.
Iyi gahunda igaragaza uburyo inzego z’umutekano zishobora kugira uruhare mu iterambere ry’Igihugu, binyuze mu bufatanye n’abaturage ndetse n’izindi nzego.
Brig Gen Karuretwa yasabye abakozi ba Leta kwisuzuma buri gihe, bakareba uko inshingano zabo zihuzwa n’icyerekezo cy’Igihugu, cyane cyane mu gutanga serivisi zinoze, gufata ibyemezo bifite ishingiro no kugaragaza umusaruro ufatika ku baturage.
Aya mahugurwa ya National Induction Programme ateganyijwe kumara ukwezi, akazitabirwa n’ibyiciro bine by’abakozi baturuka mu nzego zitandukanye za Leta, buri cyiciro kikaba kigizwe n’abagera kuri 200.
Abayitabiriye bahabwa ibiganiro bitandukanye birimo Icyerekezo 2050, Gahunda ya Kabiri y’Igihugu yo Kwihutisha Iterambere (NST2), imiyoborere myiza, ubufatanye hagati y’inzego, kubazwa inshingano no gukorera abaturage mu buryo bunoze.
Intego y’aya mahugurwa ni ukongerera abakozi ba Leta ubumenyi ku cyerekezo cy’Igihugu, kubafasha guhuza inshingano zabo n’ibyo abaturage bakeneye ndetse no kwimakaza imiyoborere ishingiye ku bunyangamugayo no gutanga umusaruro.