Manchester City yanze kuva ku izima, ijuririra icyemezo cyayihamije amakosa
Manchester City yajuririye icyemezo cya komisiyo yigenga ku irushanwa rya Premier League cyayihamije kurenga ku mategeko y’imari agenga iri rushanwa. Iyi kipe ikomeje guhakana ibyo ishinjwa, ivuga ko hari amakosa akomeye mu cyemezo cyayifatiwe.
Iyi kipe y’umupira w’amaguru yo mu Bwongereza yatangaje ko yajuririye icyemezo cyayihamije kurenga ku mategeko y’imari ya Premier League, mu rubanza rumaze iminsi ruvugwaho cyane mu bakurikiranira hafi ibya ruhago.
Manchester City yashinjwaga ibyaha 115 bifitanye isano n’amategeko ya Premier League, ikaba yarahamijwe 114 muri byo. Ibyo birego birebana n’ibikorwa byabaye hagati y’umwaka w’imikino wa 2009/10 na 2017/18, birimo uburyo amafaranga y’abaterankunga n’andi yinjizwaga mu ikipe yagaragazwaga.
BBC Sport yatangaje ko Manchester City yatanze ubujurire ku mugoroba wo ku wa Kane, tariki ya 1 Ukwakira 2026. Iyi kipe ivuga ko icyemezo cya komisiyo kirimo amakosa yigaragaza mu mategeko, mu mahame no mu byemezo bishingiye ku bimenyetso.
Manchester City yagize iti:
“Ikipe ihagaze ku mwanzuro wayo w’uko iki cyemezo kirimo amakosa akomeye mu mategeko, mu mahame no mu byabaye.”
Yongeye gushimangira ko nta kosa yakoze, ivuga ko ifite ibimenyetso byinshi ishingiraho mu kurengera uruhande rwayo.
Ibyo Manchester City yahamijwe
Komisiyo yigenga yanzuye ko mu gihe cy’imyaka hafi icyenda, Manchester City yakoresheje amasezerano y’ubucuruzi atagaragazaga neza inkomoko n’ingano nyakuri y’amafaranga yinjiraga mu ikipe.
BBC Sport ikomeza ivuga ko kimwe mu byagaragajwe ari gahunda yari igamije guhisha amafaranga arenga miliyoni 830 z’amapawundi.
Premier League yo yavuze ko Manchester City yarenze ku mategeko yayo mu buryo bwamaze hafi imyaka icumi. Iyi kipe kandi yahamijwe ibyaha byinshi bijyanye no kutorohereza iperereza, nubwo kimwe muri ibyo birego kitayihamye.
Ubujurire bwa Manchester City buzaburanishwa n’indi komisiyo yigenga igizwe n’abantu batatu bafite ubunararibonye mu by’amategeko. Amabwiriza mashya ya Premier League ateganya ko inzira y’ubujurire igomba gukorwa mu gihe cyagenwe, nubwo hari impamvu zishobora gutuma iki gihe cyongerwa.
Kugeza ubu ibihano Manchester City ishobora guhabwa ntibiratangazwa. Mu bishobora gutekerezwaho harimo ihazabu, gukurwaho amanota cyangwa ibindi bihano biteganywa n’amategeko ya Premier League, ariko bizaterwa n’uko uru rubanza n’ubujurire bizarangira.