RICA yashyize hanze abanyeshuri 82, bahabwa umukoro wo gukemura ibibazo by’ubuhinzi
Abanyeshuri barangije amasomo muri Rwanda Institute for Conservation Agriculture (RICA) basabwe gufata uburezi bahawe nk’ishoramari rigomba kubyara ibisubizo ku bibazo byugarije sosiyete, aho kubufata gusa nk’inzira ibageza ku kazi.
Kuri uyu wa Gatanu, 18 Nzeri 2026, RICA yakoze umuhango wayo wa kane wo gutanga impamyabumenyi, aho abanyeshuri 82 bo mu cyiciro cya 2026 barangije amasomo ya Bachelor of Science in Conservation Agriculture.
Wari umunsi w’ibyishimo ku barangije, imiryango n’inshuti zabo, ariko ubutumwa bwahawe aba banyeshuri bwarenze kure kwishimira impamyabumenyi. Bibukijwe ko ibyo bize bigomba kugaragarira mu bisubizo bazatanga ku bibazo biri mu buhinzi no mu mibereho y’abaturage.
“Mujye gufasha igihugu cyanyu n’abahinzi”
Howard G. Buffett, Chancellor wa RICA akaba n’uwashinze Howard G. Buffett Foundation, yasabye abarangije kutibagirwa intego y’ubumenyi bahawe, cyane cyane uruhare rwabo mu guteza imbere ubuhinzi no gushyigikira abahinzi.
Yagize ati:
Mujye hanze mufashe igihugu cyanyu kandi mushyigikire abahinzi banyu mu buryo bwiza bushoboka.
Ubu butumwa bwashyize imbere ko ubumenyi aba banyeshuri bahawe bugomba kurenga inyungu zabo bwite, bukagira uruhare mu kuzamura imibereho y’abaturage no gushakira ibisubizo ibibazo abahinzi bahura na byo.
Ku barangije muri RICA, ibyo bishobora kuvuga gukoresha ubumenyi mu kongera umusaruro, kubungabunga ubutaka, guhangana n’ingaruka z’imihindagurikire y’ibihe, gukoresha ikoranabuhanga no gushaka uburyo bushya bwo guteza imbere ubuhinzi.
Impamyabumenyi si iyo gushaka akazi gusa
Ubutumwa bwa Buffett bwaje bwiyongera ku bwa Dr Edward Kadozi, Umuyobozi Mukuru w’Inama y’Igihugu y’Amashuri Makuru, HEC, wari uhagarariye Minisitiri w’Uburezi muri uyu muhango.
Dr Kadozi yasabye abarangije kutabona impamyabumenyi nk’icyangombwa cyo kubafasha kubona akazi gusa.
Yagize ati:
Aho inzira yanyu izabageza hose, mujye mwibuka ko uburezi bwanyu ari ishoramari, kandi ko iryo shoramari ribazanira inshingano mufitiye sosiyete.
Yavuze ko ubumenyi bugomba gufasha uwize kubona ibibazo biri mu muryango, kubishakira ibisubizo no kubona amahirwe ashobora kuvamo imishinga n’imirimo mishya.
Guhindura ubumenyi ibisubizo
Dr Kadozi yavuze ko u Rwanda rukeneye abarangije amashuri bashobora gushyira mu bikorwa ibyo bize, aho kubigumana mu nyandiko cyangwa ku mpamyabumenyi gusa.
Ati:
Iyo ni yo mitekerereze u Rwanda rukeneye: abarangije bashobora guhindura ubumenyi ibisubizo, kubona amahirwe, kubaka imishinga, gukora ubushakashatsi bufite akamaro, gukoresha ikoranabuhanga mu buryo buboneye no gukorana n’abandi mu nzego zitandukanye no kurenga imipaka.
Ibi byahuje ubutumwa bwombi bwahawe aba banyeshuri: Kuba barangije amasomo si iherezo, ahubwo ni intangiriro yo kwerekana icyo ibyo bize bishobora kumarira abandi.
Dr. Kadozi wa HEC yavuze ko u Rwanda rukeneye abarangije amashuri bashobora guhindura ubumenyi ibisubizo
Umusaruro w'ibyo bize uzapimirwa ku bahinzi
RICA yigisha ubuhinzi bubungabunga umutungo kamere, mu buryo buhuza amasomo n’imirimo ifatika. Ibi bituma abanyeshuri batandukana n’ishuri bafite ubumenyi bugamije gukoreshwa mu bibazo biboneka mu buzima bwa buri munsi bw’abahinzi.
Ni na yo mpamvu Buffett yagarutse ku bahinzi mu butumwa bwe, asaba abarangije kubashyira mu mutima w’ibyo bazakora.
Ku banyeshuri 82 bahawe impamyabumenyi, ikibazo gikomeye ntabwo ari icyo bazakora nyuma yo kurangiza amashuri, ahubwo ni icyo ibyo bazakora bizahindura ku muhinzi no ku buhinzi bw’igihugu.
Impamyabumenyi mu ntoki, inshingano imbere ya 82 barangije muri RICA
Vice Chancellor w'Inzibacyuho wa RICA, Dr Olusegun A. Yerokun, ni we wayoboye igikorwa cyo kwemeza ku mugaragaro ko aba banyeshuri barangije ibisabwa kugira ngo bahabwe impamyabumenyi.
Mu gihe bahagurukaga bafite impamyabumenyi mu ntoki, basigiwe ubutumwa bubiri bwuzuzanya: gukoresha uburezi mu gukemura ibibazo bya sosiyete no gushyira imbere gufasha igihugu n’abahinzi.
Ku banyeshuri 82 barangije muri RICA, urugendo rwo mu ishuri rurangiye. Ariko urundi rwo kugaragaza agaciro k’ibyo bize mu mirima, mu bushakashatsi, mu mishinga no mu buzima bw’abahinzi, ni bwo rutangiye.
Vice Chancellor w'Inzibacyuho wa RICA, Dr Olusegun A. Yerokun, ni we wayoboye igikorwa cyo kwemeza ku mugaragaro ko aba banyeshuri barangije ibisabwa kugira ngo bahabwe impamyabumenyi.
RICA yashyize ku isoko ry'umurimo abanyeshuri 82 basoje amasomo y'imyaka itatu muri iyi kaminuza