Umujyi wa Kigali winjiye mu mikoranire n’uwa Modi’in-Maccabim-Re’ut wo muri Israel
Umujyi wa Kigali n’umujyi wa Modi’in-Maccabim-Re’ut wo muri Israel yashyize umukono ku masezerano agamije kungurana ubunararibonye mu iterambere ry’imijyi.
Kuri uyu wa Gatatu, Umuyobozi w’Umujyi wa Kigali, Samuel Dusengiyumva, n’Umuyobozi wa Modi’in-Maccabim-Re’ut muri Israel, Haim Bibas, bashyize umukono ku masezerano y’imikoranire hagati y’imijyi yombi.
Aya masezerano agamije gushyiraho ubufatanye no gukomeza ibiganiro bihuriweho, by’umwihariko mu bijyanye n’iterambere n’igenamigambi ry’imijyi.
Mu bindi bizibandwaho harimo gukoresha ikoranabuhanga mu micungire y’imijyi, guteza imbere gahunda zo kungurana ibitekerezo n’ubunararibonye, ndetse no kwigiranaho mu nzego zitandukanye.
Ibiganiro by’aba bayobozi kandi byibanze ku buryo imijyi yombi yakorana mu bijyanye n’igenamigambi, ubwikorezi n’imigendere y’abaturage ndetse no kunoza imitangire ya serivisi.
Modi’in-Maccabim-Re’ut ni umujyi wateguwe mu buryo bw’igenamigambi bugezweho muri Israel, aho ubuyobozi bwawo bwagize uruhare mu guteza imbere imikoreshereze y’ikoranabuhanga, serivisi za komini n’ubwikorezi.
Umuyobozi w’Umujyi wa Kigali, Samuel Dusengiyumva, n’Umuyobozi wa Modi’in-Maccabim-Re’ut muri Israel, Haim Bibas, bashyize umukono ku masezerano y’imikoranire hagati y’imijyi yombi
Ku ruhande rw’Umujyi wa Kigali, ubu bufatanye buje mu gihe Umujyi ukomeje gushyira imbere igenamigambi ry’iterambere ryawo, kunoza ubwikorezi rusange no guteza imbere ibikorwa remezo bijyana n’ubwiyongere bw’abaturage.
Ubu bufatanye buteganyije kuzaha imijyi yombi amahirwe yo gusangira ibisubizo ku bibazo by’imijyi, kwigira ku bunararibonye bwa mugenzi wayo no guteza imbere imishinga ihuriweho mu gihe kiri imbere.