Imvura idasanzwe yahitanye abantu batanu muri Espagne, abarenga 2100 bakurwa mu byabo
Imvura nyinshi yiswe Adam yahitanye abantu batanu muri Espagne, ituma abandi ibihumbi bakurwa mu duce twugarijwe n’imyuzure. Guverinoma y’iki gihugu yatangaje ko igiye gutanga ubufasha bwo gusana ibyangiritse, mu gihe iyi mvura yanateje impfu n’ibindi bibazo mu Bufaransa.
Nibura abantu batanu bapfuye muri Espagne bazize ingaruka z’imvura nyinshi yiswe Adam, yateje imyuzure mu duce dutandukanye tw’iki gihugu, yangiza imitungo ndetse ituma abaturage babarirwa mu bihumbi bakurwa mu duce twugarijwe.
Ikigo cy’Igihugu Gishinzwe Ubumenyi bw’Ikirere muri Espagne (AEMET) cyise iyi mvura Adam ku wa 16 Ukwakira 2026, nyuma y’ihinduka ry’ikirere ryateje imvura nyinshi idasanzwe.
Mu bantu batanu bapfuye, batatu bari mu karere ka Valencia, barimo umugore warohamye ku mucanga wa Corinto muri Sagunto, umugore wari ufite ubumuga bwo kugenda wabonetse mu igorofa ryo hasi ry’inzu ye i Oliva, n’umugabo wapfuye azize guhagarara k’umutima muri uwo mujyi.
Undi mugore yatwawe n’amazi y’umugezi i Cabrera de Mar, hafi ya Barcelona, naho umugabo umwe apfira i Málaga.
Minisitiri w’Intebe wa Espagne, Pedro Sánchez, yihanganishije imiryango y’abo bantu batanu.
Mu mujyi wa Oliva, haguye imvura ingana na litiro 600 kuri metero kare imwe mu masaha 24, mu gihe i L’Atzúvia muri Alicante haguye litiro 713 mu gihe cyose imvura yamaze.
I Pego, haguye litiro 632 mu masaha 36, zirimo 430 zaguye mu masaha atandatu gusa.
AEMET yavuze ko iyi mvura yari idasanzwe. Televiziyo y’igihugu RTVE yo ivuga ko iri mu mvura nyinshi cyane zabaye muri Espagne: mu 1987, i Oliva haguye litiro 817 kuri metero kare mu masaha 24, naho mu myuzure yo mu 2024 i Turís haguye litiro 772.
Mu karere ka Valencia, abajandarume bakuye abaturage barenga 2.100 mu duce twari twugarijwe, banatabara abagera kuri 500.
Abashinzwe umutekano barenga 1.300 bifashishije kajugujugu n’ubwato muri ibyo bikorwa.
I Oliva, abaturage bagera kuri 600 bahawe ubufasha mu kigo cy’umujyi, barimo 400 baharaye.
Ku wa Mbere, tariki ya 19 Ukwakira, ubuyobozi bw’akarere bwategetse abaturage bo mu duce 145 twa Valencia na Alicante kuguma mu ngo, ariko icyo cyemezo kiza gukurwaho uwo munsi.
Amasomo yahagaritswe ku banyeshuri barenga 100.000, naho umurongo wa telefone 112 utabarizwaho wakira ibibazo 1.713.
Mu birwa bya Baléares, haguye imvura igera kuri litiro 203 kuri metero kare mu masaha 24 i Formentera, bituma zimwe mu ngendo zo ku Kibuga cy’Indege cya Ibiza zihagarikwa.
Ku wa Kabiri, tariki ya 20 Ukwakira, Pedro Sánchez yasuye icyicaro cy’ibikorwa by’ubutabazi i Oliva, ari kumwe n’abaminisitiri n’umuyobozi w’akarere ka Valencia, Juan Francisco Pérez Llorca.
Yatangaje ko Guverinoma izemeza ko imijyi yibasiwe ifatwa nk’iyahuye n’ibiza bikomeye bisaba ubutabazi bwihariye, kugira ngo haboneke amafaranga n’uburyo bwihuse bwo gutanga amasoko ya Leta.
Yagize ati: “Guverinoma izagira uruhare mu bikorwa byo kongera kubaka.”
Ubuyobozi bwa Valencia bwemeje inkunga y’ibanze ya miliyoni 23,5 z’amayero, irimo amayero 6.000 ku muryango wangirijwe inzu y’ibanze, n’amayero 800 buri kwezi mu gihe cy’umwaka ku miryango yatakaje aho iba.
Buri buyobozi bw’umujyi bushobora guhabwa inkunga igera ku mayero 200.000.
Sánchez yanavuze ati: “Birihutirwa kugera ku bwumvikane bukomeye ku rwego rw’igihugu mu guhangana n’ikibazo cy’imihindagurikire y’ikirere.”
Mu 2024, ubuyobozi bwa Valencia bwari bwaranenzwe kubera gutinda kuburira abaturage ku myuzure, ariko kuri iyi nshuro ubutumwa bwo kuburira abaturage kuri telefone bwatangiye koherezwa mu mpera z’icyumweru.
Imyuzure yageze no mu Bufaransa
Ku wa Kabiri, tariki ya 20 Ukwakira, mu Bufaransa habonetse umurambo w’umuntu w’imyaka 75 wari watwawe n’amazi y’umwuzure i Saint-Mitre-les-Remparts, mu bilometero bigera kuri 50 mu burengerazuba bwa Marseille.
Undi muntu umwe yari akiburiwe irengero mu kirwa cya Corse.
Ikinyamakuru Euronews cyatangaje ko iyo mvura yo mu Bufaransa ifitanye isano n’inkubi Adam yibasiye Espagne.
Abashinzwe kuzimya inkongi, abapolisi n’abandi bayobozi bari mu nama i Oliva ku wa 20 Ukwakira 2026.
Ishusho yafashwe n’icyogajuru ku wa 18 Ukwakira 2026, igaragaza ibicu by’imvura yiswe Adam mu majyepfo y’uburasirazuba bwa Espagne.