Jensen Huang ari gutegura uko yasubira ku buyobozi Nvidia yeguyeho

Ibanze ·

Jensen Huang, washinze Nvidia, mu kiganiro yagiranye n’abanyeshuri ba Kaminuza ya Stanford ku wa 30 Mata 2026

Jensen Huang, washinze Nvidia, ikigo cy’Abanyamerika gikora utwuma tw’ikoranabuhanga (chips), akaba aherutse kwegura ku buyobozi bwacyo, ari gutekereza gusubira ku mwanya w’Umuyobozi Mukuru ndetse yatangiye kubiganiraho na zimwe mu nshuti ze zikomeye zamufasha muri urwo rugendo.

Kuri iki Cyumweru, tariki ya 15 Ugushyingo 2026, ikinyamakuru FT cyo mu Bwongereza cyatangaje ko Huang yamaze kuganira kuri icyo gitekerezo n’abantu bamwegereye, ishingiye ku makuru yahawe n’abazi iby’iki kibazo.

Iki kinyamakuru kivuga ko abashyigikiye Huang mu ruganda rw’ikoranabuhanga batangiye gusaba Inama y’Ubutegetsi ya Nvidia kumusubiza ku buyobozi bw’iki kigo.

Umwe muri bo yabwiye FT ko itsinda ry’abayobozi b’ibigo by’ikoranabuhanga byo muri Silicon Valley riri gushyiraho icyo yise “icyumba cy’ubukangurambaga”, kigamije gukora ubuvugizi ngo Huang asubire ku buyobozi. Yongeyeho ko abagize iryo tsinda bazashaka ubufasha bw’Ibiro bya Perezida wa Leta Zunze Ubumwe za Amerika (White House).

Yagize ati: “Abantu bose bafite ijambo mu ikoranabuhanga, batari mu bigo bikora porogaramu z’ubwenge buhangano zigezweho kurusha izindi, bakunda Jensen.”

Bivugwa ko Huang na we ashyigikiye ubu bukangurambaga.

Huang yeguye nyuma y’uko hamenyekanye ko yagiranye umubano wihariye n’umugore ukekwaho kuba intasi y’u Bushinwa.

Yatangaje kandi ko nyuma y’uko ayo makuru amenyekanye, abagize Inteko Ishinga Amategeko ya Leta Zunze Ubumwe za Amerika bihutishije ingamba zo gukumira ko utwuma tw’ikoranabuhanga tugezweho dukoreshwa mu bwenge buhangano tugera mu Bushinwa.

Ku wa 13 Ugushyingo 2026, FT yari yatangaje ko Inama y’Ubutegetsi ya Nvidia yegereye Rene Haas, Umuyobozi Mukuru wa Arm, ikigo cyo mu Bwongereza gikora utwuma tw’ikoranabuhanga (chips), kugira ngo harebwe niba yasimbura Huang.

Bivugwa ko Haas ayobora Arm kuva mu 2022, ko yakoze muri Nvidia imyaka igera kuri irindwi mu myaka irenga icumi ishize, ndetse ko agifitanye umubano mwiza na Huang na bamwe mu bagize Inama y’Ubutegetsi ya Nvidia.

Mu itangazo ryo ku wa 12 Ugushyingo 2026, Nvidia yashyikirije n’urwego rugenzura isoko ry’imari n’imigabane muri Amerika (SEC), iki kigo cyatangaje ko Huang yeguye ku mwanya wa Perezida, uw’Umuyobozi Mukuru ndetse n’uwo kuba umwe mu bagize Inama y’Ubutegetsi, ubwegure bwe bugahita butangira gukurikizwa.

Colette Kress, wari Visi Perezida Nshingwabikorwa ushinzwe imari kuva mu 2013, yemeye kuba Umuyobozi Mukuru w’agateganyo, akomeza no kuzuza inshingano ze zo gucunga imari kugeza habonetse umuyobozi uhoraho.

Inama y’Ubutegetsi yatangiye gushaka uzasimbura Huang, ikazasuzuma abakandida basanzwe bakora muri Nvidia n’abo hanze yayo. Harvey C. Jones yagizwe Umuyobozi w’Inama y’Ubutegetsi, aba umuntu wa mbere ugiye kuri uwo mwanya mu mateka y’iki kigo.

Jones yagize ati: “Inama y’Ubutegetsi ifitiye Colette n’itsinda ry’abayobozi icyizere cyuzuye, kandi twiteze ko ibikorwa by’ikigo, ibyo cyiyemeje ku bakiliya bacyo na gahunda y’iterambere ry’ibicuruzwa byacyo bizakomeza nta nkomyi.”

Ku ruhande rwe, Kress yavuze ko yiyemeje gukomeza kubakira ku musingi ukomeye Huang yubatse mu myaka 33 ishize.

Itangazo rya Nvidia ryagize riti: “Inama y’Ubutegetsi n’ikigo birashimira Jensen umusanzu we utagereranywa mu kigo no mu ruganda rw’ikoranabuhanga.”

Nk’uko byari byarateganyijwe, Nvidia izatangaza ibyavuye mu gihembwe cya gatatu cy’umwaka w’imari wa 2027 ku wa Kabiri, tariki ya 17 Ugushyingo 2026, saa 13:20 ku isaha ya Californie (saa tanu n’iminota 20 z’ijoro ku isaha y’i Kigali).

Jensen Huang ageza ijambo ku banyeshuri ba Kaminuza ya Stanford muri Leta Zunze Ubumwe za Amerika, ku wa 30 Mata 2026

Colette Kress, Umuyobozi Mukuru w’agateganyo wa Nvidia

Icyicaro gikuru cya Nvidia i Santa Clara muri Leta ya Californie

IBANZE.com

Fungura JavaScript kugira ngo ukoreshe urubuga rwose.

Subira ahabanza