SpaceX ya Elon Musk yungutse miliyari $4,4, hatangira kwigwa ibyo kuyihuza na Tesla
Sosiyete ya Elon Musk ikora iby’ikoranabuhanga ryo mu isanzure, SpaceX, yatangaje inyungu ya miliyari 4,4 z’amadolari mu mezi atatu, nyuma y’uko amafaranga yinjije yiyongereyeho 161%. Musk yanemeje ko hatangiye gusuzumwa uburyo SpaceX yahuzwa na Tesla, ariko nta cyemezo cya nyuma kirafatwa.
Sosiyete ya SpaceX iyoborwa na Elon Musk yatangaje ko yungutse miliyari 4,4 z’amadolari ya Amerika mu gihembwe cya gatatu cya 2026, bikaba bibaye ubwa mbere igaragaje inyungu mu gihembwe kuva yatangira kugurisha imigabane yayo ku isoko ry’imari.
Mu mibare yatangajwe ku wa Kabiri, tariki ya 20 Ukwakira 2026, SpaceX yagaragaje ko amafaranga yinjiye mu mezi atatu yarangiye ku wa 30 Nzeri yageze kuri miliyari 14,6 z’amadolari, avuye kuri miliyari 5,6 mu gihe nk’icyo cy’umwaka ushize, bingana n’izamuka rya 161%.
Ni impinduka ikomeye kuri iyi sosiyete yari yaragize igihombo cya miliyari 1,1 z’amadolari mu gihembwe nk’icyo cya 2025.
Mu gihembwe cya kabiri cya 2026, SpaceX yari yinjije miliyari 7,8 z’amadolari, ariko igira igihombo cya miliyoni 541.
Ikindi gipimo cy’inyungu z’imikorere y’iyi sosiyete, kibara inyungu mbere y’imisoro, inyungu ku myenda n’igabanuka ry’agaciro k’umutungo (adjusted EBITDA), cyageze kuri miliyari 8,8 z’amadolari.
Ubwenge buhangano bwarenze Starlink mu kwinjiza amafaranga
Ishami rya SpaceX ry’ubwenge buhangano ryitwa Super Intelligence ryinjije miliyari 7,56 z’amadolari, rivuye kuri miliyoni 813 mu mwaka wabanje.
Ni ubwa mbere iri shami ribaye iryinjiriza SpaceX amafaranga menshi, rirenga Starlink itanga serivisi za murandasi hifashishijwe ibyogajuru.
Super Intelligence yungutse miliyoni 431 z’amadolari mu bikorwa byayo.
Mu bakiriya bayo harimo Anthropic, ifitanye na yo amasezerano afite agaciro k’amadolari agera kuri miliyari 45 mu myaka itatu, na Google yishyura miliyoni 920 z’amadolari buri kwezi kugeza muri Kamena 2029.
Amafaranga yinjijwe na Starlink yo yiyongereyeho 69%, agera kuri miliyari 5,2 z’amadolari.
Iyi serivisi ifite abafatabuguzi miliyoni 13,6, ariko amafaranga yinjizwa ku mufatabuguzi umwe buri kwezi yagabanutse ava ku madolari 83 agera kuri 69.
SpaceX yatangaje kandi ko urugendo rwa 14 rwa Starship, ari rwo rwa mbere rwayinjirije amafaranga, rwatwaye ibyogajuru 26 bya Starlink.
Muri icyo gihembwe, SpaceX yashoye miliyari 19,6 z’amadolari, zirimo miliyari 16,4 zashowe mu bwenge buhangano.
Nyuma yo gutangaza iyi mibare, agaciro k’imigabane ya SpaceX kiyongereyeho hafi 5% mu masaha yakurikiye ifungwa ry’isoko.
Elon Musk yavuze ku byo guhuza SpaceX na Tesla
Mu kiganiro n’abashoramari, Musk yatangaje ko SpaceX na Tesla zashyizeho komite zidasanzwe zigizwe n’abayobozi bigenga, kugira ngo zisuzume igitekerezo cyo guhuza izo sosiyete zombi.
Ibyo byakozwe bisabwe n’abanyamigabane, ariko Musk yavuze ko adashobora kugira uruhare mu isuzuma kubera inyungu afite muri sosiyete zombi.
Yagize ati:
“Ntekereza ko hari abantu bibwira ko guhuza SpaceX na Tesla ari ikintu kizabaho nta kabuza. Ariko ibyo byaba ari ugukabya. Ese ntekereza ko byaba ari igitekerezo cyiza? Yego.”
Elon Musk, Umuyobozi Mukuru wa SpaceX na Tesla
Yongeyeho ati: “Komite zidasanzwe ntizirumvikana ku ngingo z’amasezerano ayo ari yo yose. Kandi birumvikana ko nta cyemeza ko zizagera ku bwumvikane.”
Mu gihe guhuza izi sosiyete byakwemezwa, Tesla yakenera gushyigikirwa n’abafite imigabane irenga kimwe cya kabiri cy’imigabane yayo yose.
Ku wa 30 Kamena 2026, Musk yari afite 48,4% by’imigabane ya SpaceX, bimuha uburenganzira bwo gutora burenga 82%, naho muri Tesla akaba yari afite hafi 20%.
Musk ni Umuyobozi Mukuru w’izi sosiyete zombi.
SpaceX yatangiye kugurisha imigabane yayo ku isoko rya Nasdaq ku wa 12 Kamena 2026, ku gaciro k’amadolari 135 ku mugabane, ikusanya miliyari 85,7 z’amadolari.
Igice cya roketi ya Super Heavy cyafashwe n’amaboko yabugenewe yo ku munara ukoreshwa mu kohereza ibyogajuru mu kirere.