Al Merrikh SC yirukanye Darko Novic nyuma yo gusezererwa muri CAF Champions League
Ikipe ya Al Merrikh SC yo muri Sudani yatandukanye n’umutoza wayo ukomoka muri Serbia, Darko Novic, nyuma y’amasaha make iyi kipe itsinze Etoile de l’Est ibitego 3-0 mu mukino wa BK Pro League wabaye ku Cyumweru, tariki ya 8 Ugushyingo 2026.
Icyemezo cyo gutandukana n’uyu mutoza cyafashwe n’ubuyobozi bwa Al Merrikh SC mu gihe yari amaze iminsi avugwaho kuba ashobora kwirukanwa, kubera umusaruro utari ushimishije abafana b’iyi kipe, by’umwihariko nyuma yo gusezererwa mu irushanwa rya CAF Champions League.
Amakuru yatangajwe n’ibitangazamakuru byo muri Sudani agaragaza ko ubuyobozi bwa Al Merrikh SC bwafashe iki cyemezo mu nama bwakoze kuri iki Cyumweru i Cairo mu Misiri.
Muri iyo nama, ubuyobozi bwemeje gutandukana na Darko Novic hamwe n’abatoza bari bamwungirije, ndetse no kuvugurura inzego zishinzwe imiyoborere y’ikipe.
Umutoza Jundi Nimeiri yahawe inshingano zo gutoza iyi kipe by’agateganyo mu gihe hagishakishwa undi mutoza uzamusimbura.
Darko Novic yari amaze igihe atoza Al Merrikh SC, nyuma yo kuyerekezamo mu 2025 avuye muri APR FC, na yo yari amaze gutoza mu mwaka w’imikino wa 2024/2025.
Mu mikino ya BK Pro League y’uyu mwaka, Al Merrikh SC yari imaze guhura n’imbogamizi zo kubona intsinzi, aho yagiye inganya imikino itandukanye, birimo kunganya na Mukura VS ndetse na Sunrise FC, zombi igitego 1-1.
Ibi byatumye abafana batandukanye bagaragaza ko batishimiye umusaruro w’umutoza, basaba ubuyobozi kumusimbuza undi washobora gufasha ikipe kugera ku ntego zayo.
Ikindi cyatumye igitutu kuri Darko Novic cyiyongera ni ugusezererwa kwa Al Merrikh SC muri CAF Champions League ya 2026/2027, ikuwemo na Horoya AC yo muri Guinée muri kamarampaka zatewe nyuma y’uko amakipe yombi anganyije igitego 1-1 mu mikino ibiri.
Nubwo Al Merrikh SC yatsinze Etoile de l’Est ibitego 3-0 kuri Kigali Pelé Stadium, mu mukino wabonetsemo ibitego bibiri bya Enock Morrison n’icya Daba Sogoba, iyo ntsinzi ntiyatumye ubuyobozi buhindura icyemezo cyo gutandukana n’uyu mutoza.
Iyo ntsinzi yari yafashije Al Merrikh SC kuva ku mwanya wa 17 igera ku wa karindwi n’amanota icyenda ku rutonde rwa BK Pro League.
Darko Novic avuye muri Al Merrikh SC nyuma yo kuba yarayifashije gusoza umwaka w’imikino wa 2025/2026 ku mwanya wa gatatu muri Shampiyona y’u Rwanda.
Uyu mutoza kandi yari yarigeze gutoza amakipe arimo APR FC yo mu Rwanda, US Monastir yo muri Tunisia, ES Sétif yo muri Algeria na Al Bukiryah yo muri Arabie Saoudite.