Amavubi atangiye neza urugendo rwa CAN 2027 atsinda Liberia imbere ya Perezida Kagame
Ikipe y’Igihugu y’u Rwanda, Amavubi, yatangiye neza urugendo rwo gushaka itike ya CAN 2027, itsinda Liberia ibitego 3-1 kuri Stade Amahoro. Ibitego byose by’u Rwanda byabonetse mu gice cya mbere cy’umukino.
Ikipe y’Igihugu y’u Rwanda, Amavubi, yatangiye urugendo rwo gushaka itike y’Igikombe cya Afurika cya 2027 itsinda Liberia ibitego 3-1, mu mukino wa mbere wo mu Itsinda K wabereye kuri Stade Amahoro i Remera, ku wa Gatanu, tariki ya 25 Nzeri 2026. Perezida Paul Kagame yitabiriye uyu mukino, agera muri stade mu gice cya mbere.
Perezida Paul Kagame yari mu bakurikiranye umukino muri Stade Amahoro
Amavubi yatangiye umukino asatira, abonera igitego hakiri kare ku munota wa gatatu. Biramahire Abeddy ni we wafunguye amazamu ku mupira yahinduriwe na Leroy-Jacques Mickels. Ku munota wa 34, u Rwanda rwabonye igitego cya kabiri cyatsinzwe na Leroy-Jacques Mickels, nyuma y’umupira wari uturutse kuri Byiringiro Jean Gilbert, ukabanza gukorwaho na Joy-Lance Mickels.
Abakinnyi b’Amavubi babanje mu kibuga ku mukino na Liberia
Amavubi yasoje igice cya mbere ayoboye 3-1
Ku munota wa 37, Niyomugabo Claude yagize uruhare rukomeye mu kurinda izamu ry’u Rwanda, akuraho umupira wari ugiye kurenga umurongo w’izamu. Liberia yahise igerageza kugaruka mu mukino, ibona igitego ku munota wa 38 cyatsinzwe na Sylvanus Nimely nyuma y’umupira wari uvuye muri koruneri. Ibyishimo by’Abanya-Liberia ntibyatinze kuko mbere y’uko igice cya mbere kirangira, ishoti rya Mugisha Bonheur ryakozweho n’ukuboko n’umukinnyi wa Liberia maze umusifuzi atanga penaliti.
Joy-Lance Mickels ni we wayiteye ku munota wa 45, ayinjiza neza bituma Amavubi ajya kuruhuka ayoboye ibitego 3-1. Uyu mukinnyi wa Sabah FK yo muri Azerbaijan, wabaye Umunyarwanda wa mbere wakinnye muri League Phase ya UEFA Champions League, yishimiye icyo gitego mu buryo bumenyerewe kuri Cristiano Ronaldo, abafana bari muri Stade Amahoro na bo bamwakirana ijwi rya “Siuuu!”.
Abakinnyi b’Amavubi bishimira kimwe mu bitego batsinze Liberia
Liberia yasatiriye ariko ntiyongera kubona igitego
Mu gice cya kabiri, Liberia yagarutse ishaka kugabanya ikinyuranyo, isatira izamu ry’Amavubi inshuro zitandukanye, ariko Ntwari Fiacre akuramo imipira myinshi. Mu minota y’inyongera, Liberia yasabye penaliti ariko umusifuzi wo hagati, Hillary Hambaba wo muri Zambia, ntiyayitanga.
Umukinnyi w’Amavubi ahanganye n’uwa Liberia
Ku munota wa 60, Liberia yasigaye ari abakinnyi 10 nyuma y’uko Kpah Sean Sherman, wari winjiye mu kibuga mu gice cya kabiri, ahawe ikarita itukura kubera gukandagira Mugisha Bonheur. Amavubi na yo yakoze impinduka zirimo kwinjiza Nshuti Innocent na Iradukunda Elie Tatou ku munota wa 67, ndetse na Mugisha Gilbert, Imanishimwe Emmanuel ‘Mangwende’ na Muhire Kevin ku munota wa 79. Noam Emeran ntiyabonye umwanya wo gukinira u Rwanda bwa mbere.
Stephen Constantine yari yabanje mu kibuga Ntwari Fiacre; Byiringiro Jean Gilbert, Niyomugabo Claude, Mutsinzi Ange na Kavita Phanuel; Mugisha Bonheur na Bizimana Djihad; Joy-Lance Mickels, Leroy-Jacques Mickels, Biramahire Abeddy na Kwizera Jojea. Kwizera Jojea na Nshuti Innocent bahawe amakarita y’umuhondo ku ruhande rw’u Rwanda, mu gihe Ayouba Kosia yarihawe ku ruhande rwa Liberia yari itozwa na Erradi Adil Mohammed wahoze atoza APR FC.
Abakinnyi ba Liberia babanje mu kibuga
Amavubi agiye gukomereza urugendo i Praia
Stade Amahoro yari yuzuyeho hafi 70% by’imyanya yayo ibihumbi 45, nyuma y’uko amatike yari yashyizwe ku isoko, ahendutse akaba yari 2000 Frw. Mu bafana ba Liberia bari bitabiriye umukino, benshi bari abanyeshuri biga mu Rwanda. Abakinnyi b’Amavubi kandi binjiye muri stade bambaye imipira yanditseho “SOBER GEN”, mu bukangurambaga bwo kurwanya ibiyobyabwenge n’inzoga zitujuje ubuziranenge mu rubyiruko.
Abafana b’Amavubi bari benshi muri Stade Amahoro
Intsinzi ya 3-1 yatumye Amavubi atangira neza urugendo rwo gushaka itike ya CAN 2027, mu gihe aya makipe yombi yari yarahuye no mu mikino yo gushaka itike ya CAN y’icyo gihe, Liberia igatsinda u Rwanda 3-2 mu 2006, naho u Rwanda rukayitsinda 4-0 mu 2007. Amavubi azakurikizaho gusura Cap-Vert i Praia ku wa 29 Nzeri 2026, mu gihe undi mukino wo muri iri tsinda wahuje Mali na Cap-Vert i Bamako kuri Stade du 26 Mars ku wa 25 Nzeri 2026.
Amafoto y’umukino