Amavubi U-17 yatakaje amahirwe ya mbere yo kubona itike ya CAN 2027
Ikipe y’Igihugu y’u Rwanda y’abatarengeje imyaka 17, Amavubi U-17, yatakaje amahirwe ya mbere yo kubona itike y’Igikombe cya Afurika cya 2027, nyuma yo gutsindwa na Somalia kuri penaliti 5-4, amakipe yombi yari yanganyije igitego 1-1 mu mukino wa ½ cy’irangiza cy’amajonjora ya CECAFA.
Uyu mukino wabereye kuri Kigali Pelé Stadium ku wa Gatandatu, tariki ya 17 Ukwakira 2026, aho u Rwanda rwashakaga intsinzi yari kuruhesha itike yo gukina Igikombe cya Afurika cy’abatarengeje imyaka 17 kizabera muri Maroc mu 2027.
Amavubi U-17 yari yageze muri iki cyiciro nyuma yo gusoza ari aya mbere mu Itsinda A n’amanota atandatu, yari yakuye ku ntsinzi ya 1-0 kuri Sudani y’Epfo n’iya 2-0 kuri Sudani.
Mu mukino na Somalia, u Rwanda rwatangiye rushaka igitego, rugenda rubona uburyo butandukanye bwo gusatira izamu ry’iyi kipe, ariko ntirubashe kububyaza umusaruro.
Igice cya mbere cyarangiye amakipe yombi anganya ubusa ku busa, bituma urugamba rwo gushaka intsinzi rukomereza mu gice cya kabiri.
Ku munota wa 63, Patrick Ujeneza wari winjiye mu kibuga asimbuye, yatsindiye Amavubi igitego cya mbere nyuma yo gucenga abakinnyi babiri ba Somalia, umupira awurenza umunyezamu Khalid Nor.
Icyakora, ibyishimo by’u Rwanda ntibyatinze kuko nyuma y’iminota ine gusa, Somalia yahise yishyura igitego gitsinzwe na Mohamud Osman, nyuma y’uko ba myugariro b’Amavubi bananiwe gukura umupira imbere y’izamu.
Amakipe yombi yakomeje gushaka igitego cy’intsinzi, ariko iminota 90 irangira anganya igitego 1-1, bituma hitabazwa penaliti kugira ngo haboneke ikipe ikomeza ku mukino wa nyuma.
Muri penaliti zirindwi buri kipe yateye, u Rwanda rwinjije enye, ruhusha eshatu zatewe na Kwizera Charles, Patrick Ujeneza na Ndizeye Isaac.
Somalia yo yinjije penaliti eshanu, itsinda u Rwanda 5-4, ihita ikatisha itike yo kujya ku mukino wa nyuma wa CECAFA ndetse n’iy’Igikombe cya Afurika cya 2027.
Nyuma y’umukino, umutoza wa Somalia, Dadir Amin Ali, yashimye abakinnyi be kuba bataracitse intege nyuma yo gutsindwa igitego, bakabasha kwishyura ndetse bagatsinda umukino kuri penaliti.
Yagaragaje ko bishimiye kugera ku mukino wa nyuma no kubona itike y’Igikombe cya Afurika, avuga ko bagiye kwitegura guhangana na Uganda.
Nubwo Amavubi U-17 atabashije kugera ku mukino wa nyuma, aracyafite amahirwe yo gukina Igikombe cya Afurika cy’abatarengeje imyaka 17.
Ku wa Mbere, tariki ya 19 Ukwakira 2026, u Rwanda ruzahura na Ethiopia mu mukino wo guhatanira umwanya wa gatatu, aho ikipe izatsinda izahita ibona itike ya nyuma yagenewe akarere ka CECAFA.
Ethiopia na yo yageze muri uyu mukino nyuma yo gutsindwa na Uganda ibitego 4-0 mu wundi mukino wa ½ cy’irangiza.
Somalia na Uganda zamaze kubona amatike y’Igikombe cya Afurika cya 2027, zikazahurira ku mukino wa nyuma wa CECAFA uzabera kuri Kigali Pelé Stadium ku wa 19 Ukwakira.
U Rwanda rurashaka kongera kwitabira Igikombe cya Afurika cy’abatarengeje imyaka 17, aho ruheruka mu 2011 ubwo rwari rwacyakiriye rukagera ku mukino wa nyuma.
Amavubi U-17 asigaje gutsinda Ethiopia kugira ngo yongere kubona itike y’iri rushanwa nyuma y’imyaka 16 ataryitabira, mu gihe gutsindwa byasobanura ko inzozi zo kwerekeza muri Maroc mu 2027 zirangiye.
Imyambaro y’Amavubi U-17 yari iteguwe mu rwambariro mbere y’umukino na Somalia
Abakinnyi 11 b’Amavubi U-17 babanje mu kibuga ku mukino na Somalia
Abakinnyi 11 ba Somalia babanje mu kibuga
Ba kapiteni b’amakipe yombi hamwe n’abasifuzi mbere y’uko umukino utangira
Umukinnyi w’Amavubi U-17 ahatanira umupira n’uwa Somalia
Abakinnyi b’amakipe yombi bahatanira umupira mu kirere
Umukinnyi w’Amavubi U-17 atera umupira mu gice cya mbere ngo arebe ko batsinda Somalia
Amavubi U-17 na Somalia bahatanira umupira mu gice cya mbere
Abafana bari baje kureba umukino kuri Kigali Pelé Stadium ari benshi