Amavubi U23 yanyagiye Sudan, atera intambwe ya mbere igana muri CAN 2027
Amavubi y’abatarengeje imyaka 23 yatangiye neza urugendo rwo gushaka itike y’Igikombe cya Afurika cya 2027, atsinda Sudan U23 ibitego 3-0 kuri Kigali Pelé Stadium. Niyigena Abdul, Shingiro Honore na Sindi Paul Jesus ni bo batsinze.
Iyi kipe y’Igihugu y’u Rwanda, yateye intambwe ikomeye mu gushaka itike y’Igikombe cya Afurika cya 2027 nyuma yo gutsinda Sudani U23 ibitego 3-0 mu mukino ubanza w’ijonjora ry’ibanze.
Uyu mukino wabereye kuri Kigali Pelé Stadium ku wa Gatatu, tariki ya 30 Nzeri 2026, u Rwanda rukinira imbere y’abafana barwo.
Amavubi U23 yatangiye umukino asatira izamu rya Sudan, abona igitego cya mbere hakiri kare. Ku munota wa 10, Muhoza Daniel yateye ‘corner’ neza, Niyigena Abdul ayisanganiza umutwe, umupira uruhukira mu rushundura.
U Rwanda rwakomeje kotsa igitutu Sudan. Ku munota wa 29, Shingiro Honore yongeye kunyeganyeza inshundura ku mupira yari ahawe na Muhoza, ariko igitego nticyemerwa nyuma y’uko umusifuzi wo ku ruhande, Nouho Ouattara wo muri Côte d’Ivoire, agaragaje ko uwo mukinnyi yari yaraririye.
Hari n’andi mahirwe yashoboraga gutuma Amavubi U23 ajya kuruhuka afite ibitego birenze kimwe, aho Sindi Paul Jesus yateye coup franc ikomeye, umupira ukubita umutambiko w’izamu.
Amavubi yongereye umuvuduko mu gice cya kabiri
Hashize iminota ibiri gusa igice cya kabiri gitangiye, u Rwanda rwabonye igitego cya kabiri. Sultan Bobo yazamukanye umupira awugeza kuri Muhoza Daniel, na we awuhereza Shingiro Honore. Uyu mukinnyi yabonye ko umunyezamu wa Sudan, Mustafa Mohamed Elgadal Fahoud, atari ahagaze neza, ahita amutsinda, Amavubi U23 ayobora 2-0.
Umutoza Nshimiyimana Eric yakomeje gushaka ibindi bitego, akora impinduka zirimo gukuramo Kayibanda Smith wo hagati mu kibuga, yinjiza rutahizamu Yangiriyeneza Erirohe.
Muhoza Daniel na we yabonye uburyo bwiza bwo kongera ibitego, ariko ishoti rye rikubita igiti cy’izamu.
Igitego cya gatatu cyabonetse ku munota wa 78. Umunyezamu wa Sudani yasohotse nabi, Sindi Paul Jesus amutanga ku mupira, ahita awutera mu izamu ryari risigaye nta muntu uririmo.
Umukino warangiye Amavubi U23 atsinze 3-0, atsindira impamba ikomeye mu rugendo ruzayerekeza mu mukino wo kwishyura.
Amakipe yombi azongera guhura ku wa Kabiri, tariki ya 6 Ukwakira 2026, i Juba muri Sudani y’Epfo. Biteganyijwe ko Amavubi U23 azahaguruka i Kigali ku wa Gatanu, tariki ya 2 Ukwakira.
Ikipe izakomeza nyuma y’iyi mikino yombi izahura na Cameroun U23 mu ijonjora rya kabiri ryo gushaka itike y’Igikombe cya Afurika cya 2027.