Amavubi yagarutse i Kigali, ahanze umukino wo kwishyura

Bonheur Uzayisenga ·

Abakinnyi b’Amavubi bagera i Kigali bavuye muri Mali

Ikipe y’igihugu y’u Rwanda, Amavubi, yageze i Kigali mu gitondo cyo kuri wa Gatandatu, tariki ya 14 Ugushyingo 2026, ivuye muri Mali, aho yari yakiniye umukino wo gushaka itike y’Igikombe cya Afurika (CAN 2027).

Amavubi yahagurutse i Bamako mu ijoro ryo ku wa Gatanu rishyira ku wa Gatandatu. Ishyirahamwe ry’Umupira w’Amaguru mu Rwanda (FERWAFA) ryari ryatangaje ko iyi kipe izagera i Kigali saa yine n’igice z’igitondo.

Ku wa Gatanu, tariki ya 13 Ugushyingo 2026, Amavubi yatsinzwe na Mali ibitego 3-2 kuri Stade du 26 Mars, mu mukino w’umunsi wa gatatu wo gushaka itike y’Igikombe cya Afurika mu itsinda K. Ibitego by’u Rwanda byatsinzwe na Kwizera Jojea na Kavita Phanuel.

Iyo ntsinzi yatumye Mali igira amanota icyenda, mu gihe u Rwanda rwasigaranye amanota atandatu. Amakipe abiri azasoza ari aya mbere muri iri tsinda ni yo azabona itike yo kwitabira Igikombe cya Afurika cya 2027.

Amavubi akigera i Kigali, yakiriwe neza n’abafana. FERWAFA, ibinyujije ku mbuga nkoranyambaga zayo, yashimiye abafana urukundo bagaragarije ikipe y’igihugu n’uburyo bayishyigikiye, ibasaba kongera kuyishyigikira mu mukino wo kwishyura.

FERWAFA kandi yatangaje ko Amavubi yageze mu rugo amahoro, igaragaza ko intego yayo ari ugushimisha abafana mu mukino azakinira imbere yabo.

Amavubi azakira Mali mu mukino wo kwishyura uteganyijwe ku wa Kabiri, tariki ya 17 Ugushyingo 2026, saa tatu z’ijoro, kuri Stade Amahoro i Kigali.

Ikipe y’Igihugu, Amavubi, ubwo yahagurukaga muri Mali

IBANZE.com

Fungura JavaScript kugira ngo ukoreshe urubuga rwose.

Subira ahabanza