Amavubi yageze i Praia, yakirwa na Ambasaderi w’u Rwanda mbere yo guhura na Cabo Verde
Ikipe y’Igihugu y’u Rwanda, Amavubi, yageze amahoro i Praia muri Cabo Verde, yakirwa n’Ambasaderi w’u Rwanda muri icyo gihugu, Festus Bizimana, mbere y’umukino wa kabiri wo gushaka itike ya CAN 2027 uzayihuza na Cabo Verde ku wa 29 Nzeri 2026.
Ikipe y’Igihugu y’u Rwanda y’umupira w’amaguru, Amavubi, yageze amahoro i Praia, umurwa mukuru wa Cabo Verde, aho igiye gukinira umukino wa kabiri wo mu Itsinda K mu rugendo rwo gushaka itike y’Igikombe cya Afurika cya 2027 (CAN 2027).
Nk’uko Ishyirahamwe ry’Umupira w’Amaguru mu Rwanda (FERWAFA) ryabitangaje mu ijoro ryo ku wa Gatandatu, tariki ya 26 Nzeri 2026, Amavubi azakina na Cabo Verde ku wa Kabiri, tariki ya 29 Nzeri 2026.
FERWAFA yagize iti: “Praia, twahageze. Amavubi yageze amahoro i Praia muri Cabo Verde. Urugamba rukurikiyeho ruradutegereje. Intego iracyari ya yindi. Urugamba rurakomeje.”
Abakinnyi b’Amavubi bururuka indege bageze i Praia muri Cabo Verde
Abakinnyi b’Amavubi bageze i Praia bamwenyura
Abagize itsinda ry’Amavubi basohoka mu ndege i Praia
Ambasaderi Bizimana yakiriye Amavubi
Bakigera muri Cabo Verde, abagize itsinda ry’Amavubi bakiriwe n’Ambasaderi w’u Rwanda muri Cabo Verde, Festus Bizimana.
FERWAFA yatangaje ko Ambasaderi Bizimana “yakiriye delegasiyo y’Amavubi i Praia, aho baje kwitegura umukino wa kabiri wo gushaka itike yo kuzitabira igikombe cya Afurika 2027, uzahuza u Rwanda na Cabo Verde ku wa 29 Nzeri.” Ryongeyeho riti: “Intego ni imwe. Imihigo irakomeje.”
Ambasaderi w’u Rwanda muri Cabo Verde, Festus Bizimana, aganiriza abagize itsinda ry’Amavubi
Abakinnyi b’Amavubi bakurikiye ubutumwa bahawe bakigera i Praia
Abakinnyi b’Amavubi bakiriwe i Praia mbere yo gutangira kwitegura umukino wa Cabo Verde
Nyuma yo gutsinda Liberia
Amavubi yageze muri Cabo Verde nyuma yo gutangira neza urugendo rwa CAN 2027, atsinda Liberia ibitego 3-1 kuri Stade Amahoro ku wa Gatanu, tariki ya 25 Nzeri 2026, mu mukino witabiriwe na Perezida Paul Kagame. Ibitego by’u Rwanda byatsinzwe na Biramahire Abeddy, Leroy-Jacques Mickels na Joy-Lance Mickels kuri penaliti, byose mu gice cya mbere.
Mu wundi mukino w’Itsinda K wabaye uwo munsi, Mali yatsinze Cabo Verde ibitego 3-1 i Bamako. Ibitego bya Mali byatsinzwe na Mamady Tia na Dorgeles Nene watsinze bibiri, mu gihe icya Cabo Verde cyatsinzwe na Steven Lopes Cabral.
Bamwe mu bagize itsinda ry’Amavubi mu rugendo rwerekeza muri Cabo Verde
Cabo Verde yavuye mu Gikombe cy’Isi
Cabo Verde, izwi ku izina rya “Blue Sharks”, iheruka kwandika amateka yitabira Igikombe cy’Isi cya 2026 ku nshuro yayo ya mbere. Ubu itozwa na Humberto Bettencourt, wasimbuye Bubista wagiye gutoza RS Berkane yo muri Maroc, nyuma y’imyaka itandatu yari amaze amwungirije.
Itsinda K rigizwe n’u Rwanda, Mali, Cabo Verde na Liberia. Amakipe abiri ya mbere muri iri tsinda ni yo azabona itike yo kwitabira CAN 2027, izabera muri Kenya, Uganda na Tanzania. Ku munsi wa kabiri w’amatsinda, Mali na yo izasura Liberia ku wa 29 Nzeri 2026.