Amavubi yahangamuye Cabo Verde iwayo, Vozinha yinjizwa ibitego bibiri
Amavubi yatsindiye Cabo Verde 2-1 i Praia, akomeza intangiriro nziza mu gushaka itike ya CAN 2027. U Rwanda rwahungabanyije igitinyiro cya Cabo Verde yari ivanye mu Gikombe cy’Isi, runinjiza ibitego bibiri Vozinha wari umwe mu ntwari zayo.
Ibi byabaye mu mukino w’umunsi wa kabiri wo gushaka itike y’Igikombe cya Afurika cya 2027.
Cabo Verde yari yinjiye muri uyu mukino ifite igitinyiro gikomeye nyuma y’urugendo rwayo rw’amateka mu Gikombe cy’Isi cya 2026, aho yageze muri 1/16 cy’irangiza. Umunyezamu Vozinha yari umwe mu bayifashije cyane muri iryo rushanwa, ariko imbere y’Amavubi izamu rye ryinjijwemo kabiri.
Cabo Verde ni yo yabanje gutsinda ku munota wa 40 binyuze kuri Gilson Benchimol Tavares. Amavubi ntiyacitse intege, Claude Niyomugabo yishyura mbere y’uko amakipe ajya kuruhuka.
Mu gice cya kabiri, umutoza Stephen Constantine yahise yinjiza Elie Tatou Iradukunda asimbura Abeddy Biramahire. Iyo mpinduka yatanze umusaruro kuko ku munota wa 52, Iradukunda yahise atsinda igitego cya kabiri cy’u Rwanda.
Iyo ntsinzi yatumye amagambo Constantine yari yavuze mu ntangiriro z’iki cyumweru arushaho kugarukwaho. Yari yatangaje ko “impinduramatwara yatangiye,” agaragaza ko Amavubi ari gutangira urugendo rushya kandi ko akeneye gushyigikirwa na buri wese. Nyuma yo gutsinda Cabo Verde, yongeye gushimangira ko iyo “mpinduramatwara” koko yatangiye.
Gutsindira i Praia byatumye u Rwanda rugira amanota atandatu kuri atandatu, nyuma yo kubanza gutsinda Liberia 3-1 i Kigali, ruhita ruyobora Itsinda K.
Ku ruhande rwa Cabo Verde, ubudahangarwa n’igitinyiro yari ivanye mu Gikombe cy’Isi byahungabanyijwe n’Amavubi, mu gihe Vozinha wari uherutse kwamamara ku rwego rw’Isi yongeye kuva mu kibuga izamu rye ryinjijwemo ibitego bibiri.