Amavubi yitegura Mali: Mugisha Bonheur, Leroy-Jacques Mickels na Mugisha Gilbert bageze mu mwiherero
Abakinnyi b’Ikipe y’Igihugu Amavubi, Mugisha Bonheur, Leroy-Jacques Mickels na Mugisha Gilbert, basanze bagenzi babo mu mwiherero wo kwitegura imikino ibiri u Rwanda ruzahuramo na Mali mu gushaka itike y’Igikombe cya Afurika cya 2027.
Kuri uyu wa Mbere, tariki ya 9 Ugushyingo 2026, Ishyirahamwe ry’Umupira w’Amaguru mu Rwanda (FERWAFA) ryashyize hanze amafoto ya Mugisha Bonheur na Leroy-Jacques Mickels, ribaha ikaze mu mwiherero w’Amavubi.
Mugisha Bonheur ukinira Al Hazem yo muri Arabie Saoudite na Leroy-Jacques Mickels ukinira Waldhof Mannheim yo mu Budage, biyongereye ku bakinnyi bamaze iminsi bitegura iyi mikino.
Ku rundi ruhande, Mugisha Gilbert ukinira Jwaneng Galaxy yo muri Botswana na we yageze aho Amavubi acumbitse ngo afatanye kwitegura na bagenzi be.
Aba bakinnyi basanze bagenzi babo mu gihe umutoza Stephen Constantine akomeje gutegura ikipe izahangana na Mali mu mikino y’umunsi wa gatatu n’uwa kane yo mu Itsinda K.
U Rwanda ruzabanza gusura Mali ku wa Gatanu, tariki ya 13 Ugushyingo 2026, mu mukino uzabera i Bamako, mbere y’uko amakipe yombi yongera guhura ku wa Kabiri, tariki ya 17 Ugushyingo, kuri Stade Amahoro i Kigali.
Amavubi arinjira muri iyi mikino afite amanota atandatu yakuye mu ntsinzi ebyiri, nyuma yo gutsinda Liberia ibitego 3-1 i Kigali no gutsindira Cap-Vert iwayo ibitego 2-1.
Mali na yo ifite amanota atandatu, nyuma yo gutsinda Cap-Vert ibitego 3-1 na Liberia igitego 1-0.
Ibi bituma imikino ibiri izahuza u Rwanda na Mali igira uruhare rukomeye mu rugamba rwo gushaka itike y’Igikombe cya Afurika cya 2027, kizabera muri Kenya, Uganda na Tanzania.
Mugisha Bonheur ukinira Al Hazem yo muri Arabie Saoudite yageze i Kigali
Leroy-Jacques Mickels ukinira Waldhof Mannheim yo mu Budage, yiyongereye ku bakinnyi bamaze iminsi bitegura Mali