Arsène Wenger yahisemo kudahangana na Infantino mu matora ya Perezida wa FIFA

Darius Hakuzimana ·

Arsène Wenger (ibumoso) na Perezida wa FIFA, Gianni Infantino (iburyo)

Umufaransa Arsène Wenger wamamaye mu gutoza Arsenal, ntaziyamamariza kuyobora FIFA ahanganye na Perezida wayo, Gianni Infantino, nubwo Impuzamashyirahamwe y’Umupira w’Amaguru i Burayi (UEFA) yagerageje kumwemeza ko yakwiyamamaza mu matora ateganyijwe muri Werurwe 2027.

Ibi byatangajwe n’ikinyamakuru The Sunday Times cyo mu Bwongereza ku mugoroba wo ku wa Gatandatu, tariki ya 14 Ugushyingo 2026, mu nkuru yihariye yanditswe na Martyn Ziegler, umunyamakuru mukuru ushinzwe imikino muri icyo kinyamakuru.

Nk’uko iki kinyamakuru kibivuga, UEFA yagerageje kumvisha Wenger w’imyaka 77 ko akwiye gutanga kandidatire ye ku mwanya wa Perezida wa FIFA, ariko uyu Mufaransa avuga ko atazaba umukandida muri ayo matora.

The Sunday Times yatangaje kandi ko abayobozi ba FIFA bahuye na Arsène Wenger, bamusaba kutiyamamaza ahanganye na Gianni Infantino.

Mu butumwa Martyn Ziegler yashyize ku rubuga rwa X, yavuze ko nyuma y’uko Wenger yanze kwiyamamaza, “UEFA iri gutekereza ku bundi buryo”, ariko ntiyasobanuye ubwo buryo ubwo ari bwo.

Arsène Wenger wavutse ku wa 22 Ukwakira 1949, yatoje Arsenal kuva mu 1996 kugeza mu 2018, ayihesha ibikombe bitatu bya shampiyona y’u Bwongereza (Premier League) n’ibikombe birindwi bya FA Cup.

Kimwe mu byo Wenger azahora yibukirwaho muri Arsenal ni uko yayihesheje igikombe cya shampiyona mu mwaka w’imikino wa 2003-2004, idatsinzwe umukino n’umwe.

Kuva ku wa 13 Ugushyingo 2019, Wenger ni Umuyobozi Mukuru ushinzwe Iterambere ry’Umupira w’Amaguru ku Isi muri FIFA.

Nk’uko FIFA yabitangaje ubwo yamuhaga izo nshingano, Wenger ashinzwe kugenzura no guteza imbere umupira w’amaguru w’abagabo n’uw’abagore ku isi, akaba ari na we mpuguke iyoboye imirimo ijyanye na tekiniki mu mupira w’amaguru, by’umwihariko amahugurwa y’abatoza.

Gianni Infantino ayobora FIFA kuva mu 2016. Ku wa 16 Werurwe 2023, mu Nteko Rusange ya 73 ya FIFA yabereye i Kigali mu Rwanda, yongeye gutorwa ku bwumvikane, ahabwa manda y’imyaka ine, kuva mu 2023 kugeza mu 2027.

Ku wa 30 Mata 2026, mu Nteko Rusange ya 76 ya FIFA yabereye i Vancouver muri Canada, Infantino yatangaje ko aziyamamariza kongera kuyobora iyi mpuzamashyirahamwe.

Yagize ati: “Nzaba umukandida mu matora ya Perezida wa FIFA umwaka utaha.”

FIFA yatangaje ko Inteko Rusange yayo ya 77, ari na yo izatorerwamo Perezida, izabera i Rabat muri Maroc ku wa Kane, tariki ya 18 Werurwe 2027.

Amategeko shingiro ya FIFA ateganya ko amashyirahamwe 211 y’umupira w’amaguru y’ibihugu, agize iyi mpuzamashyirahamwe, ari yo yonyine afite uburenganzira bwo gutanga abakandida ku mwanya wa Perezida.

Kandidatire yemerwa ari uko ishyigikiwe nibura n’amashyirahamwe atanu kandi ikaba yaragejejwe mu nyandiko ku Bunyamabanga Bukuru bwa FIFA, nibura amezi ane mbere y’uko Inteko Rusange itangira.

Bityo, abashaka kwiyamamariza kuyobora FIFA mu matora ataha bagomba kuba batanze kandidatire zabo bitarenze tariki ya 18 Ugushyingo 2026.

Perezida wa FIFA, Gianni Infantino yemeje ko azongera kwiyamamaza

Arsène Wenger asezera ku bafana ba Arsenal kuri Emirates Stadium, nyuma y’umukino wa nyuma yayitoje mu rugo, ku wa 6 Gicurasi 2018

IBANZE.com

Fungura JavaScript kugira ngo ukoreshe urubuga rwose.

Subira ahabanza