Djibril Ouattara yongereye amasezerano muri APR FC kugeza mu 2028
Rutahizamu ukomoka muri Burkina Faso akaba na kapiteni wa APR FC, Cheick Djibril Ouattara, yongereye amasezerano muri iyi kipe y’Ingabo z’Igihugu, azatuma akomeza kuyikinira kugeza mu 2028.
APR FC yatangaje aya makuru kuri uyu wa Kane, tariki ya 5 Ugushyingo 2026, ibinyujije ku mbuga nkoranyambaga zayo no ku rubuga rwayo rwa internet, nyuma yo gusinyana n’uyu mukinnyi amasezerano mashya.
Mu butumwa yaherekeje amafoto agaragaza Ouattara ashyira umukono ku masezerano, APR FC yagaragaje ko uyu rutahizamu akomeje urugendo rwe muri iyi kipe, kandi ko intego zo guhatanira ibikombe zikomeje.
Aya masezerano aje nyuma y’uko Ouattara agaragaje umusaruro mwiza kuva yagera muri APR FC muri Mutarama 2025, ubwo yayerekezagamo avuye muri JS Kabylie yo muri Algeria.
Mu mwaka w’imikino wa 2025/2026, uyu rutahizamu w’imyaka 27 yatsinze ibitego 18 muri BK Pro League, bimuhesha igihembo cy’umukinnyi watsinze ibitego byinshi muri shampiyona y’u Rwanda.
Muri uwo mwaka w’imikino, Ouattara yanafashije APR FC kwegukana ibikombe bitatu birimo icya Shampiyona y’u Rwanda, Igikombe cy’Amahoro n’Igikombe kiruta ibindi (FERWAFA Super Cup).
Muri Nyakanga 2026, Ouattara yagizwe kapiteni wa APR FC, asimbuye Niyomugabo Claude wari umaze gutandukana n’iyi kipe.
Uyu mukinnyi wavukiye mu Mujyi wa Bobo-Dioulasso muri Burkina Faso, ku wa 19 Nzeri 1999, yatangiye gukina umupira w’amaguru muri Vitesse FC, aza gukomereza muri ASF Bobo-Dioulasso, mbere yo kwerekeza muri RS Berkane yo muri Maroc mu 2018.
Mu gihe yamaze muri RS Berkane, yatwaranye n’iyi kipe igikombe cya CAF Confederation Cup mu mwaka w’imikino wa 2019/2020, ndetse n’ibikombe bibiri bya Throne Cup muri Maroc.
Djibril Ouattara yongereye amasezerano muri APR FC kugeza mu 2028
Nyuma yo kunyura mu yandi makipe arimo Olympic Club de Safi na JS Kabylie, yerekeje muri APR FC, aho yaje kuba umwe mu bakinnyi ngenderwaho mu busatirizi bwayo.
Kuba APR FC yongereye amasezerano ya Ouattara kugeza mu 2028 biyifasha kugumana rutahizamu wayifashije kwitwara neza mu myaka ibiri y’imikino iheruka, mu gihe ikomeje guhatanira ibikombe imbere mu gihugu no ku rwego mpuzamahanga.
Aya masezerano aje nyuma y’uko Ouattara agaragaje umusaruro mwiza kuva yagera muri APR FC muri Mutarama 2025