FERWAFA yashyize hanze abakinnyi 55 bahamagawe mu Mavubi U23 n’ikipe nkuru
Ishyirahamwe ry’Umupira w’Amaguru mu Rwanda (FERWAFA) ryashyize hanze intonde z’agateganyo z’abakinnyi b’Amavubi U23 n’ikipe nkuru, bitegura imikino yo gushaka itike y’Igikombe cya Afurika cya 2027. Amavubi U23 yahamagariwe abakinnyi 27, mu gihe ikipe nkuru yahamagariwe 28.
Ikipe y’Igihugu y’u Rwanda y’abatarengeje imyaka 23, itozwa na Eric Nshimiyimana, izahura na Cameroun mu mikino ibiri y’icyiciro cya kabiri cy’amajonjora y’Igikombe cya Afurika cy’abatarengeje imyaka 23. Umukino ubanza uzabera kuri Kigali Pelé Stadium ku wa 11 Ugushyingo 2026, naho uwo kwishyura ukinwe ku wa 17 Ugushyingo i Yaoundé muri Cameroun.
Ku rundi ruhande, ikipe y’Igihugu nkuru, itozwa na Stephen Constantine, yahamagariye abakinnyi kwitegura imikino y’umunsi wa gatatu n’uwa kane y’amajonjora y’Igikombe cya Afurika cya 2027, aho u Rwanda ruzahura na Mali. Umukino ubanza uzabera kuri Stade du 26 Mars i Bamako ku wa 13 Ugushyingo 2026, naho uwo kwishyura ube ku wa 17 Ugushyingo kuri Stade Amahoro i Kigali.
Urutonde rw’agateganyo rw’Amavubi U23 ruriho abakinnyi 27 bakina mu makipe atandukanye yo mu Rwanda no mu mahanga, harimo abo mu Bwongereza, mu Bufaransa, mu Bubiligi no muri Ukraine. Mu bahamagawe harimo Kayibanda Claude Smith ukinira Bedford Town FC, Enzo Bagabo wa Beerschot VA na Niyo David ukinira NK Veres. Harimo kandi Shingiro Honoré wa Kiyovu Sports, Muhoza Daniel wa Rayon Sports na Niyigena Abdoul wa Étoile de l’Est.
Naho mu bakinnyi 28 bahamagawe mu ikipe y’Igihugu nkuru harimo Manzi Thierry ukinira Al Golan SC, Mbonyumwami Taiba wa Ethiopian Coffee SC, Mickels Joy Lance wa Sabah FK na Niyomugabo Claude, ugaragara ku rutonde rwa FERWAFA nk’utarafite ikipe. Harimo kandi Mutsinzi Ange, Bizimana Djihad, Mugisha Bonheur na Nshuti Innocent.
Mu mikino ibiri ibanza yo mu itsinda K ry’amajonjora y’Igikombe cya Afurika cya 2027, Amavubi nkuru yitwaye neza atsinda Liberia ibitego 3-1, mbere yo gutsindira Cape Verde iwayo ibitego 2-1. Izi ntsinzi zatumye u Rwanda rugira amanota atandatu, anganya na Mali na yo yatsinze imikino yayo ibiri ibanza.
Ku ruhande rw’Amavubi U23, yatangiye urugendo rwo gushaka itike y’Igikombe cya Afurika cya 2027 ahura na Sudan mu cyiciro cya mbere cy’amajonjora. U Rwanda rwatsinze umukino ubanza ibitego 3-0 i Kigali, mbere yo kunganya 1-1 mu mukino wo kwishyura wabereye i Juba muri Sudani y’Epfo.
Ibyo byatumye Amavubi U23 asezerera Sudan ku giteranyo cy’ibitego 4-1, abona itike yo gukomeza mu cyiciro cya kabiri cy’amajonjora, aho agomba guhura na Cameroun.
Urutonde rw’agateganyo rw’abakinnyi bazifashishwa mu mikino yo ku munsi wa gatatu n’uwa kane w’amajonjora yo gushaka itike ya AFCON U23
Urutonde rw’agateganyo rw’abakinnyi bazifashishwa mu mikino yo ku munsi wa gatatu n’uwa kane w’amajonjora yo gushaka itike ya AFCON 2027.