Formula 1 yashyize hanze ingengabihe y’amarushanwa ya 2027
Formula 1 yashyize hanze ingengabihe y’amarushanwa yayo yo mu 2027, igaragaza ko hazakinwa Grand Prix 24 mu bihugu 22, mu gihe amarushanwa ya Sprint azongerwa akava kuri atandatu akagera ku 10.
Iyi ngengabihe yatangajwe kuri uyu wa Gatatu, tariki ya 16 Nzeri 2026, nyuma yo kwemezwa n’Inama Nkuru ya FIA ishinzwe imikino yo gusiganwa ku modoka, World Motor Sport Council.
Shampiyona ya 2027 izatangirira muri Bahrain hagati ya tariki ya 12 na 14 Werurwe, ikomereze muri Arabie Saoudite mbere yo kwerekeza muri Australia, u Buyapani n’u Bushinwa. Nyuma y’amarushanwa yo muri Amerika ya Ruguru, Formula 1 izerekeza ku mugabane w’u Burayi, mbere yo gusorezwa muri Qatar na Abu Dhabi mu Ukuboza.
Mu mpinduka zikomeye zigaragara kuri iyi ngengabihe harimo kugaruka kwa Grand Prix ya Portugal, izabera kuri Portimão muri Kamena. Iki kibuga cyaherukaga kwakira Formula 1 mu 2021, nyuma yo kuyakira no mu 2020 mu gihe ingengabihe yari yarahinduwe cyane n’icyorezo cya COVID-19.
Türkiye na yo izongera kugaruka muri Formula 1, Grand Prix yayo ibere kuri Istanbul Park. Iki kibuga cyaherukaga kwakira isiganwa rya Formula 1 mu 2021, ariko ubu cyasinye amasezerano azatuma gikomeza kuyakira kugeza mu 2031.
Indi mpinduka ikomeye izaba mu marushanwa ya Sprint. Formula 1 yatangaje ko mu 2027 azaba 10, avuye kuri atandatu. Bahrain, Australia, Japan, Monaco na Abu Dhabi bizakira Sprint ku nshuro ya mbere, mu gihe Canada, Great Britain, Italy, Brazil na Qatar na byo bizayakira. Ubuyobozi bwa Formula 1 buvuga ko imibare yayo igaragaza ko impera z'icyumweru zirimo Sprint zikurikirwa n’abantu benshi kurusha izisanzwe.
Muri Formula 1, Grand Prix ni ryo siganwa nyamukuru ry'impera z'icyumweru, risanzwe rifite intera ya kilometero hafi 305, mu gihe Sprint ari isiganwa rigufi rya kilometero hafi 100, ritwara iminota nka 30 kandi rigatanga amanota ku bashoferi umunani ba mbere.
Hari kandi Practice, aho abashoferi n’amakipe bageragereza imodoka no kuyitunganya, na Qualifying, isiganwa ryo kugena imyanya imodoka zizahagurukiraho muri Grand Prix.
Impera z'icyumweru zirimo Sprint ziba zifite irindi rushanwa ryo kugena uko bazahaguruka muri Sprint, bigatuma ibikorwa byo guhatana bitangira kare kurusha mu bindi bihe bisanzwe. Mu 2027, Formula 1 izagira impera z'icyumweru 10 za Sprint, umubare munini kurusha iyindi myaka yabanje.
Ingengabihe y'amarushanwa ya Formula 1 mu mwaka utaha wa 2027
Iyi ngengabihe yasohowe kandi igaragaza uburyo Formula 1 ikomeje gushyira amarushanwa yo mu duce twegeranye ku matariki akurikirana, mu rwego rwo kugabanya ingendo ndende no koroshya uburyo amakipe, ibikoresho n’abakozi bimurwa hagati y’ibihugu bitandukanye.
Nubwo Formula 1 yakoze impinduka zitandukanye ku ngengabihe ya 2027, Afurika yongeye kutagaragaraho, mu gihe uyu mugabane uheruka kwakira Grand Prix mu 1993, ubwo isiganwa ryaberaga i Kyalami muri Afurika y’Epfo.
U Rwanda ruhanze amaso 2029
Kuba Afurika itagaragara kuri kalendari ya 2027 bibaye mu gihe u Rwanda rukomeje ibiganiro byo kwakira Formula 1 Grand Prix, nyuma yo gutangaza ku mugaragaro icyifuzo cyarwo mu Ukuboza 2024. Umushinga uteganya ko isiganwa ryabera ku kibuga byagiye bivugwa ko gishobora kubakwa hafi ya Bugesera.
Nubwo nta masezerano ya nyuma aratangazwa, 2029 ni wo mwaka u Rwanda rugaragaza nk’uwo rwifuza gutangiriramo kwakira Formula 1. Mu Ukuboza 2025, Umuyobozi Mukuru wa RDB, Jean-Guy Afrika, yavuze ko u Rwanda ruri mu biganiro bigamije kureba niba rushobora kwakira isiganwa muri uwo mwaka, gahunda zijyanye kandi n’ibikorwa by'iterambere hafi y’Ikibuga Mpuzamahanga cy’Indege cya Bugesera.
Formula 1 na yo ikomeje kuvuga ko kugaruka muri Afurika biri muri gahunda zayo. Muri Kanama 2026, Umuyobozi Mukuru wayo Stefano Domenicali yavuze ko ibiganiro ku isiganwa ryo muri Afurika “bigenda neza”, ariko ntiyatangaza igihugu cyangwa umwaka byemejwe. Bityo, 2029 ikomeje kuba intego u Rwanda ruhanze amaso.
Türkiye na yo izongera kugaruka muri Formula 1
Kuri iyi ngengabihe harimo kugaruka kwa Grand Prix ya Portugal, izabera kuri Portimão
U Rwanda ruhanze amaso 2029