Harry Kane yegukanye Ballon d’Or ya 2026 nyuma yo gutsinda ibitego 73
Rutahizamu w’Umwongereza ukinira Bayern Munich, Harry Kane, yegukanye igihembo cya Ballon d’Or cya 2026, gihabwa umukinnyi witwaye neza kurusha abandi ku Isi, kiba icya mbere atwaye mu buzima bwe bw’umupira w’amaguru.
Iki gihembo yagishyikirijwe n’icyamamare mu mupira w’amaguru wo muri Brazil, Ronaldo Nazário, uzwi nka R9, wacyegukanye inshuro ebyiri mu 1997 no mu 2002.
Kane w’imyaka 33 yagihawe mu muhango wabereye muri London Palladium mu Bwongereza, ku wa Mbere, tariki ya 26 Ukwakira 2026, mu birori byo kwizihiza imyaka 70 Ballon d’Or imaze itangwa.
Uyu Mwongereza yari mu bahabwaga amahirwe menshi yo kwegukana iki gihembo, ahanganye n’abarimo Kylian Mbappé wa Real Madrid na Lamine Yamal wa FC Barcelona.
Kane yitwaye neza mu mwaka w’imikino wa 2025/2026, atsinda ibitego 73 mu mikino 65 yakinnye muri Bayern Munich no mu Ikipe y’Igihugu y’u Bwongereza.
Muri ibyo bitego, 61 yabitsinze muri Bayern Munich, mu gihe 12 yabitsinze mu ikipe y’igihugu, harimo bitandatu yatsinze mu Gikombe cy’Isi cya 2026 cyabereye muri Leta Zunze Ubumwe za Amerika, Canada na Mexique.
Uyu rutahizamu yafashije Bayern Munich kwegukana Shampiyona y’u Budage, Bundesliga, Igikombe cy’u Budage ndetse na Super Cup, anasoza ari we watsinze ibitego byinshi muri Bundesliga, aho yatsinze 36.
Mu Gikombe cy’Isi cya 2026, Kane yafashije u Bwongereza kwegukana umwanya wa gatatu, anaba umukinnyi watsindiye icyo gihugu ibitego byinshi mu mateka y’iri rushanwa.
Kwegukana Ballon d’Or byatumye Kane aba Umwongereza wa mbere utwaye iki gihembo kuva mu 2001, ubwo cyegukanwaga na Michael Owen wakiniraga Liverpool.
Abaye Umwongereza wa gatanu mu mateka wegukanye Ballon d’Or, nyuma ya Stanley Matthews, Bobby Charlton, Kevin Keegan na Michael Owen.
Kane kandi yegukanye igihembo cya Gerd Müller Trophy cy’umukinnyi watsinze ibitego byinshi mu bagabo, bityo ava muri uyu muhango afite ibihembo bibiri.
Abandi begukanye ibihembo
Mu bagore, Umunya-Espagne Alexia Putellas yegukanye Ballon d’Or ku nshuro ya gatatu, nyuma yo kuyitwara mu 2021 no mu 2022. Uyu mukinnyi wa London City Lionesses yari yagize uruhare rukomeye mu ntsinzi za FC Barcelona mu mwaka w’imikino wa 2025/2026.
Lamine Yamal wa FC Barcelona yegukanye igihembo cy’umukinnyi ukiri muto witwaye neza kurusha abandi mu bagabo, ku nshuro ya gatatu yikurikiranya, mu gihe Vicky López, na we ukinira Barcelona, yegukanye icy’umukinnyi ukiri muto mu bagore ku nshuro ya kabiri yikurikiranya.
Mu bihembo by’abatsinze ibitego byinshi, Kane yegukanye Gerd Müller Trophy mu bagabo, naho Charlyn Corral ukinira Pachuca yo muri Mexique acyegukana mu bagore.
Mu banyezamu, Unai Simón wa Athletic Club yegukanye igihembo cy’umunyezamu mwiza mu bagabo, mu gihe Cata Coll wa FC Barcelona yagitwaye mu bagore.
Luis de la Fuente utoza Ikipe y’Igihugu ya Espagne yegukanye igihembo cy’umutoza mwiza mu bagabo, nyuma yo gufasha Espagne gutwara Igikombe cy’Isi cya 2026. Pere Romeu wa FC Barcelona yahawe icy’umutoza mwiza mu bagore.
Paris Saint-Germain yatowe nk’ikipe y’umwaka mu bagabo ku nshuro ya kabiri yikurikiranya, mu gihe FC Barcelona y’Abagore yegukanye igihembo cy’ikipe y’umwaka mu bagore.
Umwongereza Bukayo Saka ukinira Arsenal yegukanye igihembo cya Sócrates Award, gitangwa ku mukinnyi wakoze ibikorwa by’indashyikirwa by’ubugiraneza no gufasha abaturage.
Saka yashimiwe ibikorwa bye binyuze mu muryango wa Big Shoe ufasha abana kubona ubuvuzi. Mu ijambo yavugiye muri uyu muhango, yanagarutse ku mwana wo mu Rwanda witwa Biren Giroe, wafashijwe kongera kubona nyuma yo kugira ikibazo cy’amaso, bikamufasha gukomeza amasomo no gukurikirana inzozi ze zo kuzaba umwarimu w’Icyongereza.
Ballon d’Or yatangiye gutangwa mu 1956, aho igihembo cya mbere cyegukanywe n’Umwongereza Stanley Matthews. Mu bakinnyi bayegukanye inshuro nyinshi harimo Lionel Messi ufite umunani na Cristiano Ronaldo ufite eshanu.
Mbappe ntiyahiriwe n’uyu mugoroba mu Bwongereza
Lamine Yamal we yatwaye igihembo cy’umukinnyi ukiri muto witwaye neza
Harry Kane na Alexia Putellas begukanye Ballon d’Or mu bagabo no mu bagore
Harry Kane avuga ijambo nyuma yo gushyikirizwa Ballon d’Or na Ronaldo Nazário
Vicky López wa FC Barcelona yegukanye igihembo cy’umukinnyi ukiri muto mu bagore ku nshuro ya kabiri yikurikiranya
Charlyn Corral ukinira Pachuca yegukanye igihembo cy’uwatsinze ibitego byinshi mu bagore
Unai Simón wa Athletic Club yegukanye igihembo cy’umunyezamu mwiza mu bagabo
Cata Coll wa FC Barcelona yegukanye igihembo cy’umunyezamu mwiza mu bagore
Luis de la Fuente utoza Espagne yegukanye igihembo cy’umutoza mwiza mu bagabo
Pere Romeu wa FC Barcelona yahawe igihembo cy’umutoza mwiza mu bagore
FC Barcelona y’Abagore yegukanye igihembo cy’ikipe y’umwaka mu bagore
Bukayo Saka ukinira Arsenal yegukanye igihembo cya Sócrates Award