Jerry Koosman wamamaye muri New York Mets yapfuye afite imyaka 83
Umunyabigwi mu mukino wa baseball, Jerry Koosman, wafashije ikipe ya New York Mets kwegukana igikombe cya World Series mu 1969, yapfuye ku wa 1 Ugushyingo 2026, nyuma yo kumara igihe arwaye.
Jerry Koosman, umwe mu bakinnyi b’ibyamamare mu mateka ya baseball muri Leta Zunze Ubumwe za Amerika, yapfuye afite imyaka 83.
Urupfu rwe rwemejwe n’ikipe ya New York Mets ku Cyumweru, tariki ya 1 Ugushyingo 2026. Koosman yaguye mu gace ka Osceola, muri Wisconsin, aho yari akikijwe n’abana be nyuma yo kumara igihe ahanganye n’indwara zitandukanye.
Jerry Martin Koosman yavukiye i Appleton, muri Minnesota, tariki ya 23 Ukuboza 1942. Yari umukinnyi wa baseball uzwi cyane mu gutera umupira, akoresha ukuboko kw’ibumoso.
Yatangiye gukinira New York Mets mu 1967, nyuma aza kuba umwe mu bakinnyi b’ingenzi muri iyi kipe. Yayikiniye Mets imyaka 12, mbere yo gukinira Minnesota Twins, Chicago White Sox na Philadelphia Phillies.
Mu myaka 19 yamaze mu marushanwa akomeye ya baseball, Koosman yatsinze imikino 222, atsindwa 209, ndetse agira ibihe 2,556 byo gutsinda abakinnyi b’amakipe bahanganye ababuza gukubita umupira, bizwi nka strikeouts.
Koosman azakomeza cyane kwibukwa uruhare yagize mu gufasha New York Mets kwegukana igikombe cya World Series mu 1969, mu ikipe yiswe Miracle Mets.
Muri uwo mwaka, Mets yatsinze Baltimore Orioles mu mikino ya nyuma, aho Koosman yagize uruhare rukomeye mu gutsinda umukino wa kabiri n’uwa gatanu. Umukino wa gatanu ni wo wahesheje igikombe New York Mets ku nshuro ya mbere mu mateka yayo.
Uyu mukinnyi kandi yagiye mu bakinnyi batoranyijwe mu ikipe y’abitwaye neza ya MLB mu 1968 no mu 1969.
Mu 1989, Jerry Koosman yashyizwe mu cyiciro cy’abanyabigwi ba New York Mets. Mu 2021, iyi kipe yanasezereye burundu nimero 36 yari yarambaraga, mu rwego rwo kumushimira uruhare yagize mu mateka yayo.
Koosman asize amateka akomeye muri baseball, cyane cyane mu bakinnyi bakoresha ukuboko kw’ibumoso mu gutera umupira, ndetse n’abagize uruhare mu ntsinzi zidasanzwe za New York Mets mu 1969.