Kyle De Beer yegukanye Rwanda Open 2026 muri Golf
Umunya-Afurika y’Epfo Kyle de Beer ni we wegukanye Rwanda Open 2026, irushanwa rya golf ryabereye mu Rwanda ku nshuro ya mbere nk’irushanwa ryemewe na Sunshine Tour, nyuma y’iminsi ine ryakinirwaga i Kigali.
Iri rushanwa ryatangiye ku wa 24 Nzeri 2026, risozwa ku Cyumweru, tariki ya 27 Nzeri 2026. Ryahuje abakinnyi barenga 150, barimo abagere kuri 50 baturutse muri Afurika y’Epfo ndetse n’Abanyarwanda 13.
Mu Banyarwanda bitabiriye iri rushanwa harimo Nshimiyumuremyi Emile, Habimana François, Dusabe Jules, Nsabimana Aloys, Maniraguha Adam, Olivier Munyaneza, Ndahisenga Ernest, Ryiringiro Jacques, Hakizimana Jean Baptiste, Hitayesu Jean Baptiste, Niyonkuru Alain, Dusabe Felix na Nsanzuwera Celestin.
Mu bakinnyi b’Abanyarwanda, Dusabe Felix, wakinaga mu cyiciro cy’abatarabigize umwuga, ni we witwaye neza kurusha abandi, ahabwa igihembo cya “Amateur Player of the Year”.
Ku rundi ruhande, Celestin Nsanzuwera, usanzwe ari nimero ya mbere mu Rwanda muri golf, ntiyagize amahirwe menshi muri iri rushanwa kuko yarisoje ku mwanya wa 20.
Kyle de Beer yigaragaje kuva ku munsi wa mbere
Kyle de Beer ni we wagaragaje umusaruro ukomeye mu minsi yose ine y’irushanwa. Ku munsi wa mbere yakoze 66 kuri 72, ku munsi wa kabiri akora 65 kuri 72, ku munsi wa gatatu akora 66 kuri 72, naho ku munsi wa nyuma akora 64 kuri 72.
Ibyo byatumye asoza irushanwa ari ku manota 27 munsi ya par, aba umukinnyi wenyine wageze kuri uwo mubare, bituma yegukana igikombe. Sunshine Tour yemeje ko de Beer yegukanye irushanwa ku kinyuranyo cy’amanota atandatu, anatsinda Rwanda Open afite -27.
Umunya-Afurika y’Epfo Kyle De Beer ni we wegukanye irushanwa rya Golf rya Sunshine Tour
Ku ntsinzi ye, de Beer yahembwe igikombe ndetse ahabwa sheki ya 396,250 Rand, angana na hafi 36,082,120 Frw.
Umwanya wa kabiri wegukanywe na Estiaan Conradie, na we ukomoka muri Afurika y’Epfo, wasoje ari ku manota 21 munsi ya par.
Abakinnyi Daniel Cronje, Allen John, Benjamin Kedochim, Travis Procter, Ryan van der Klis na Cole Stevens bose baranganyije amanota, buri umwe asoza afite amanota 20 munsi ya par.
Muri Golf, par ni umubare w’inkoni (shots) umukinnyi uteganyirijwe gukoresha kugira ngo arangize umwobo runaka cyangwa ikibuga cyose. Urugero, niba umwobo ari par 4, bisobanuye ko umukinnyi aba ateganyijwe kuwurangiza akoresheje inkoni enye.
Iyo akoresheje nke kurusha par, aba yakoze neza kurushaho; iyo akoresheje nyinshi, aba arengeje par. Ni yo mpamvu iyo bavuga ko umukinnyi yarangije irushanwa ari -27, biba bivuze ko yakoresheje inkoni 27 nke ugereranyije na par yose yari iteganyijwe kuri iryo rushanwa.
Kyle De Beer ni we wagaragaje umusaruro ukomeye mu minsi yose ine y’irushanwa