Manchester United yirukanye Michael Carrick

Ikipe ya Manchester United yemeje ku mugaragaro ko yatandukanye n’umutoza wayo Michael Carrick, nyuma y’umusaruro mubi yagize mu ntangiriro z’umwaka w’imikino wa 2026/27, mu gihe Mauricio Pochettino ari hafi kumusimbura.
Mu butumwa yanyujije ku rubuga rwayo rwa Instagram kuri uyu wa Kane, tariki ya 12 Ugushyingo 2026, Manchester United yatangaje iti: “Turemeza ko Michael Carrick yavuye ku nshingano ze nk’umutoza mukuru w’ikipe y’abagabo.”
Iyi kipe yasobanuye ko yafashe iki cyemezo kigoye, ariko ko cyari gikenewe kugira ngo ishobore kugera ku ntego zayo. Yashimiye Carrick ubwitange n’ubunyamwuga yagaragaje, inatangaza ko ishaka kubona umutoza mushya uzamusimbura mu gihe cya vuba.
Carrick w’imyaka 45 yari yagarutse muri Manchester United muri Mutarama 2026, ayifasha gusoza umwaka w’imikino wa 2025/26 ku mwanya wa gatatu muri Premier League no kubona itike yo gukina UEFA Champions League.
Uwo musaruro watumye ahabwa amasezerano yo gukomeza gutoza iyi kipe kugeza mu 2028, ariko ntiyabashije gukomeza kwitwara neza.
Mu mikino 10 ibanza ya Premier League muri uyu mwaka w’imikino, Manchester United yatsinzemo umwe gusa, bituma iguma ku mwanya wa 18 n’amanota umunani, mu makipe atatu ari mu myanya ishobora kuyamanura mu cyiciro cya kabiri.
Nyuma yo gutandukana na Carrick, Manchester United iri mu biganiro byo guha akazi Mauricio Pochettino, usanzwe atoza Ikipe y’Igihugu ya Leta Zunze Ubumwe za Amerika.
Amakuru avuga ko impande zombi zamaze kumvikana ku mahame y’ibanze y’amasezerano, ariko hakaba hakiri ibiganiro ku mafaranga asabwa kugira ngo Pochettino asesweho amasezerano afitanye n’Ishyirahamwe ry’Umupira w’Amaguru muri Amerika.
Uyu mutoza w’Umunya-Argentine w’imyaka 54 yanyuze mu makipe arimo Southampton, Tottenham Hotspur, Paris Saint-Germain na Chelsea.
Manchester United irifuza kubona umutoza mushya mbere y’umukino uzayihuza na Liverpool ku wa 22 Ugushyingo 2026, ariko kugeza ubu ntiremeza ku mugaragaro ko Pochettino ari we uzasimbura Carrick.
Manchester United yirukanye Michael Carrick
Mauricio Pochettino ari hafi guhabwa inshingano zo gusimbura Michael Carrick