McNulty yegukanye Shampiyona y’Isi y’Amagare ya 2026
Umunyamerika Brandon McNulty yegukanye Shampiyona y’Isi y’Amagare ya 2026 mu cyiciro cy’abagabo, ahita yambara umwambaro w’umukororombya wari usanzwe ufitwe na Tadej Pogačar.
Yegukanye Shampiyona y’Isi y’Amagare ya 2026 mu cyiciro cy’abagabo, nyuma yo kwitwara neza mu isiganwa ryasorejwe mu Mujyi wa Montréal muri Canada ku Cyumweru, tariki ya 27 Nzeri 2026.
Abakinnyi 184 ni bo batangiriye isiganwa ryari rifite intera y’ibilometero 273,4, bazenguruka imihanda ya Montréal inshuro 12. Abagera kuri 58 ni bo babashije kugera ku murongo usoza.
Mu bilometero 35 bya nyuma, McNulty yavuye mu itsinda ry’abakinnyi bari kumwe, agenda arisiga ndetse ashyiraho ikinyuranyo cyageze hagati y’amasegonda 30 n’umunota umwe.
Nubwo abakinnyi bakomeye barimo Mathieu van der Poel, Isaac del Toro, Tom Pidcock, Mads Pedersen na Remco Evenepoel bagerageje kumushyiraho igitutu, McNulty yakomeje kuyobora isiganwa kugeza ku murongo usoza.
Bagenzi be bakinana mu Ikipe y’Igihugu ya Leta Zunze Ubumwe za Amerika, Quinn Simmons na Matteo Jorgenson, na bo bagize uruhare mu gufasha ikipe yabo gukomeza kugira umwanya mwiza muri iri siganwa.
McNulty yageze ku murongo usoza amaze gukoresha amasaha atandatu, iminota 17 n’amasegonda ane. Michael Matthews yabaye uwa kabiri, naho Mathieu van der Poel asoza ku mwanya wa gatatu.
Uyu mukinnyi w’imyaka 28 yavuze ko iyi ntsinzi ari ikintu gikomeye kuri we.
Yabaye Umunyamerika wa mbere mu myaka 33 wegukanye Shampiyona y’Isi y’Amagare mu cyiciro cy’abagabo, nyuma ya Lance Armstrong wabikoze mu 1993.
McNulty yahise yambara umwambaro w’umukororombya uhabwa uwegukanye Shampiyona y’Isi, wari usanzwe ufitwe n’Umunya-Slovenia Tadej Pogačar.
Pogačar yari yegukanye Shampiyona y’Isi y’Amagare yabereye mu Rwanda mu 2025, ubwo Kigali yabaga umujyi wa mbere muri Afurika wakiriye iri rushanwa.
Kwegukana iri rushanwa si bwo bwa mbere McNulty agaragaje ubushobozi ku rwego mpuzamahanga. Mu 2016, yegukanye Shampiyona y’Isi mu cyiciro cy’abakiri bato.
Leta Zunze Ubumwe za Amerika kandi zakomeje kwitwara neza muri Shampiyona y’Isi y’Amagare ya 2026, nyuma y’uko Barry Ashlin na we yegukanye umudali wa zahabu mu cyiciro cy’abatarengeje imyaka 23.