Minisitiri Mukazayire yashimiye RSSB Tigers yitabiriye FIBA Intercontinental Cup
Minisitiri wa Siporo, Nelly Mukazayire, yashimiye RSSB Tigers ku muhate n’ubwitange yagaragaje muri FIBA Intercontinental Cup 2026, aho yabaye ikipe ya mbere yo mu Rwanda yitabiriye iri rushanwa ndetse igasoreza ku mwanya wa kane.
Minisitiri wa Siporo, Nelly Mukazayire, yashimiye RSSB Tigers nyuma yo gusoza FIBA Intercontinental Cup 2026 ku mwanya wa kane, mu irushanwa yabereyemo u Rwanda n’Umugabane wa Afurika.
RSSB Tigers yabaye ikipe ya mbere yo mu Rwanda yitabiriye FIBA Intercontinental Cup, nyuma yo kubona itike nk’ikipe yegukanye Basketball Africa League (BAL) 2026.
Mu butumwa Minisitiri Mukazayire yashyize ku rubuga rwa X, yashimiye iyi kipe kuba yaranditse amateka ndetse ikagaragaza umuhate n’ubwitange mu mikino yakiniye i Beijing mu Bushinwa.
Turashimira cyane RSSB Tigers yanditse amateka ikaba ikipe ya mbere yo mu Rwanda igeze mu mikino FIBA Intercontinental Cup ndetse bakegukana n’umwanya wa 4. Mwarakoze gukinana umuhate n’ubwitange muhagarariye u Rwanda ndetse na Afurika!
RSSB Tigers yatangiye irushanwa itsindwa na Rytas Vilnius yo muri Lithuania, mbere yo gutsinda Shanghai Sharks yo mu Bushinwa amanota 117-115 nyuma y’iminota y’inyongera. Iyo ntsinzi yayifashije gukomeza muri ½ cy’irangiza.
Muri ½, RSSB Tigers yatsinzwe na NBA G League United amanota 114-95, bituma ijya mu mukino wo guhatanira umwanya wa gatatu.
Mu mukino wo guhatanira umwanya wa gatatu, RSSB Tigers yatsinzwe na Boca Juniors yo muri Argentine amanota 93-62, isoreza irushanwa ku mwanya wa kane mu makipe atandatu yari aryitabiriye.
NBA G League United ni yo yegukanye FIBA Intercontinental Cup 2026, Rytas Vilnius iba iya kabiri, Boca Juniors iba iya gatatu, mu gihe RSSB Tigers yasoreje ku mwanya wa kane.