Mu mvura, Amavubi makuru na U23 akomeje imyitozo yitegura imikino ikomeye
Ikipe y’Igihugu y’u Rwanda y’Abakuru, Amavubi, n’iy’Abatarengeje imyaka 23 (U23), zakomeje imyitozo ihuriweho mu mvura, mu rwego rwo kwitegura imikino yo gushaka itike y’Igikombe cya Afurika.
Kuri uyu wa Gatandatu, tariki ya 7 Ugushyingo 2026, Ishyirahamwe ry’Umupira w’Amaguru mu Rwanda (FERWAFA) ryasangije abakunzi b’umupira w’amaguru amafoto y’abakinnyi bari mu myitozo, ritangaza ko imyiteguro ikomeje kugenda neza.
Iyi myitozo iri gukorwa mu gihe abakinnyi b’Amavubi makuru bakina mu mahanga bakomeje kugera mu mwiherero, mu gihe ikipe y’Abatarengeje imyaka 23 yo yamaze kubona abakinnyi bose bahamagawe.
FERWAFA yatangaje ko uko iminsi igenda ishira, ari ko umwuka n’imbaraga mu myitozo bikomeza kwiyongera, abakinnyi bose bakaba bashyize umutima ku mikino ibategereje.
Amavubi makuru, atoza n’Umwongereza Stephen Constantine, aritegura imikino ibiri azahuramo na Mali mu itsinda K ryo gushaka itike y’Igikombe cya Afurika cya 2027.
Umukino ubanza uzabera i Bamako ku wa 13 Ugushyingo, naho uwo kwishyura ube ku wa 17 Ugushyingo 2026 kuri Stade Amahoro.
Ku rundi ruhande, Amavubi U23 atoza na Eric Nshimiyimana aritegura guhangana na Cameroun mu cyiciro cya kabiri cy’amajonjora yo gushaka itike y’Igikombe cya Afurika cy’Abatarengeje imyaka 23.
Umukino ubanza uzabera kuri Kigali Pelé Stadium ku wa 11 Ugushyingo 2026, naho uwo kwishyura uzabere i Yaoundé ku wa 17 Ugushyingo.
Izi kipe zombi zatangiye umwiherero ku wa 5 Ugushyingo 2026, zikaba ziteganya gukorana imyitozo ihuriweho inshuro zigera kuri enye, hagamijwe kongera ubufatanye n’ubunararibonye hagati y’abakinnyi.