Nyuma ya Djibril Ouattara, APR FC yongereye amasezerano Hakim Kiwanuka
Ikipe ya APR FC yatangaje ko yongereye amasezerano y’imyaka itatu rutahizamu wayo ukomoka muri Uganda, Hakim Kiwanuka, uzayikinira kugeza mu 2029.
Aya masezerano mashya yatangajwe kuri iki Cyumweru, tariki ya 8 Ugushyingo 2026, mu gihe uyu mukinnyi ukina asatira izamu anyuze ku mpande yari asanzwe afite amasezerano yagombaga kurangira muri Mutarama 2027.
Kiwanuka w’imyaka 26 yageze muri APR FC muri Mutarama 2025 avuye muri SC Villa yo muri Uganda, aho yari yaritwaye neza mu marushanwa y’icyiciro cya mbere.
Kuva yagera mu Rwanda, uyu mukinnyi yagize uruhare mu ntsinzi zitandukanye za APR FC, zirimo kwegukana ibikombe bya Shampiyona y’u Rwanda mu myaka y’imikino ya 2024/2025 na 2025/2026.
Mu mwaka w’imikino wa 2025/2026, Kiwanuka yakinnye imikino 20 muri BK Pro League, atsinda ibitego bitanu anatanga imipira ibiri yavuyemo ibitego.
Muri uyu mwaka w’imikino wa 2026/2027, yari amaze gukina imikino itatu, atsinda igitego kimwe anatanga imipira ibiri yavuyemo ibitego.
Kongera amasezerano kwa Kiwanuka bije nyuma y’iminsi mike APR FC yongereye amasezerano rutahizamu wayo akaba na kapiteni, Cheick Djibril Ouattara, na we wasinye azamugeza mu 2028.
Ibi byemezo biri mu byo APR FC ikomeje gufata mu rwego rwo kugumana bamwe mu bakinnyi bayo b’ingenzi, mu gihe ishaka gukomeza guhatanira ibikombe byo mu Rwanda.