Perezida Kagame yakurikiye umuhango wo gutangiza Imikino Olempike ibereye muri Afurika ku nshuro ya mbere
Perezida w’u Rwanda, Paul Kagame, yifatanyije na mugenzi we wa Sénégal, Bassirou Diomaye Faye, n’abandi Bakuru b’Ibihugu mu muhango wo gutangiza Imikino Olempike y’Urubyiruko ya Dakar 2026, ibaye iya mbere mu mateka y’imikino Olempike ibereye ku mugabane wa Afurika.
Uyu muhango wabaye ku mugoroba wo ku wa Gatandatu, tariki ya 31 Ukwakira 2026, kuri Stade Abdoulaye Wade i Diamniadio, hafi y’umurwa mukuru Dakar.
Amafoto yashyizwe ahagaragara n’Ibiro by’Umukuru w’Igihugu cy’u Rwanda agaragaza Perezida Kagame aganira na Perezida Bassirou Diomaye Faye, mu gihe indi foto imwerekana yitabiriye ibirori byabereye muri iyi stade.
Uyu muhango witabiriwe n’abandi banyacyubahiro barimo Perezida wa Guinée-Bissau, Umuganwa Albert II wa Monaco, ndetse n’abayobozi mu nzego mpuzamahanga za siporo.
Ibirori byo gufungura iyi mikino byaranzwe n’imbyino, indirimbo n’ibindi bikorwa by’umuco byagaragaje amateka, ubuhanzi n’umuco bya Sénégal n’umugabane wa Afurika muri rusange.
Perezida Bassirou Diomaye Faye ni we watangaje ku mugaragaro ko iyi mikino itangiye, nyuma y’ibikorwa bitandukanye byari birimo kwinjira muri stade kw’abakinnyi bahagarariye ibihugu byabo.
Imikino Olempike y’Urubyiruko ya Dakar 2026 izasozwa ku wa 13 Ugushyingo 2026. Biteganyijwe ko yitabirwa n’abakinnyi bagera ku 2.655, bafite imyaka hagati ya 14 na 17, bahagarariye komite Olempike z’ibihugu 204, hamwe n’ikipe y’impunzi.
Aba bakinnyi bazahatana mu mikino 25, mu byiciro 153 bitangirwamo imidali. Amarushanwa azabera mu bice bitatu bya Sénégal, ari byo Dakar, Diamniadio na Saly.
Perezida Paul Kagame aganira na Perezida Bassirou Diomaye Faye watangaje ku mugaragaro ko iyi mikino itangiye
Iyi mikino ifite umwihariko wo kuba ari yo ya mbere mu mateka y’imikino Olempike, yaba iy’abakuru cyangwa iy’urubyiruko, yakiriwe n’igihugu cyo ku mugabane wa Afurika.
Kwakira iri rushanwa bifatwa nk’intambwe ikomeye kuri Sénégal no kuri Afurika, cyane cyane mu guteza imbere impano z’abakiri bato no kwerekana ubushobozi bw’umugabane mu gutegura amarushanwa mpuzamahanga akomeye.