RSSB Tigers igiye gucakirana na NBA G League United muri ½ cya FIBA Intercontinental Cup
Ikipe ya RSSB Tigers ihagarariye u Rwanda igiye guhura na NBA G League United muri ½ cya FIBA Intercontinental Cup 2026, iri kubera i Beijing mu Bushinwa.
Uyu mukino uteganyijwe ku wa Gatandatu, tariki ya 26 Nzeri 2026, saa 09:30 za mu gitondo ku isaha y’i Kigali (saa 15:30 i Beijing), ukazabera muri National Indoor Stadium.
RSSB Tigers yabonye itike ya ½ nyuma yo gusoza ku mwanya wa kabiri mu Itsinda A, inyuma ya Rytas Vilnius yo muri Lithuania.
Ikipe yo mu Rwanda yatangiye irushanwa itsindwa na Rytas, ariko iza kwigaranzura Shanghai Sharks mu mukino wa kabiri, ikora comeback ikomeye nyuma yo kuba yarushwaga amanota 19.
RSSB Tigers yaje gutsinda Shanghai Sharks 117-115 nyuma ya overtime, intsinzi yakomeje kuyisigira amahirwe yo kugera muri ½.
Itike yayo yaje kwemezwa nyuma y’uko Rytas Vilnius itsinze Shanghai Sharks 107-66, igasoza ku mwanya wa mbere mu Itsinda A itsinze imikino yayo yombi.
Ibi byatumye RSSB Tigers isoza ku mwanya wa kabiri, ihita ibona uburenganzira bwo gukomeza mu mikino yo gukuranamo.
Muri ½, RSSB Tigers izahura na NBA G League United, na yo yabonye itike iturutse mu Itsinda B.
Imibare y’irushanwa igaragaza ko RSSB Tigers imaze kujya itsinda ku mpuzandengo amanota 103, igafata rebounds 36 ndetse igatanga assists 17.5 kuri buri mukino, mu gihe NBA G League United iri ku manota 99, rebounds 34.5 na assists 17 kuri buri mukino.
Mu gutsinda amanota abiri, RSSB Tigers iri kuri 58.4%, mu gihe NBA G League United iri kuri 62.9%. Mu manota atatu, Tigers iri kuri 35.6%, naho NBA G League United ikaba iri kuri 38.3%.
Intsinzi muri uyu mukino yaba ishyize RSSB Tigers ku mukino wa nyuma wa FIBA Intercontinental Cup, aho yaba isigaje intambwe imwe ngo yegukane igikombe mpuzamahanga cy’amakipe.