RSSB Tigers yakuye intsinzi mu menyo ya rubamba imbere ya Shanghai Sharks
Ikipe ya RSSB Tigers yanditse amateka mashya itsinda Shanghai Sharks yo mu Bushinwa amanota 117-115, mu mukino wa FIBA Intercontinental Cup wabereye i Beijing kuri uyu wa Gatatu.
Ikipe RSSB Tigers yanditse amateka mashya itsinda Shanghai Sharks yo mu Bushinwa amanota 117-115, mu mukino wa FIBA Intercontinental Cup wabereye i Beijing kuri uyu wa Gatatu.
Kapiteni w'iyi kipe Antino Jackson Jr. ni we wabaye intwari y’umukino nyuma yo gutsinda 'Lancer franc' ebyiri zikomeye hasigaye amasegonda arindwi gusa ngo igice cy’inyongera kirangire. Izo penaliti zatumye RSSB Tigers yongera kujya imbere ku manota 117-115.
RSSB Tigers yari yatangiye umukino nabi, ndetse Shanghai Sharks yari yigeze kuyirusha amanota agera kuri 20. Gusa iyi kipe ihagarariye u Rwanda yakomeje kugaruka mu mukino yitwara neza cyane mu gice cya kane, bituma amakipe yombi arangiza iminota isanzwe anganya 103-103 bigizwemo uruhare rukomeye na Craig Randall II winjije amanota 3 mu masegonda ya nyuma bityo hongerwaho iminota itanu.
Mu minota y’inyongera RSSB Tigers yasaga n’iyegukanye intsinzi ubwo yari imbere 115-111 hasigaye amasegonda 37.
Shanghai Sharks yagarutse irongera iranganya ndetse igira amahirwe yo gutuma umukino wongera kujya mu yindi minota y’inyongera ku nshuro ya kabiri.
RSSB Tigers kandi muri iyi minota yari isigaye idafite umukinnyi wayo Tyler Bey wari umaze gusohorwa mu mukino nyuma yo gukora amakosa atanu.
RSSB Tigers yatsinze Shanghai Sharks mu minota ya nyuma
Kapiteni Jackson yaje kugarura RSSB Tigers imbere ku manota abiri nyuma yo gutsinda 'lancer franc' 2 muri 3 yahawe hasigaye amasegonda ane. Shanghai yabonye amahirwe ya nyuma yo gutsinda amanota atatu, ariko umupira ntiwajyamo, bityo RSSB Tigers yegukana intsinzi.
Umukinnyi Craig Randall II wari wagowe no kubona amanota atatu mu mukino batsinzwe na Rytas Vilnius yo muri Lithuania ku wa Kabiri, yongeye kugaragaza ubuhanga bwe mu gutsinda, ayobora RSSB Tigers n’amanota 30.
Tyler Bey yatsinze amanota 19, Osborn Shema agira 16 Ntore Habimana atsinda 15 mu gihe Teafale Lenard na Antino Jackson Jr. buri umwe yatsinze amanota 12.
Ku ruhande rwa Shanghai Sharks Brandon Goodwin ni we watsinze amanota menshi mu mukino agira 37.
Iyi ntsinzi ikomeye itumye RSSB Tigers, ari yo kipe yatwaye igikombe cya Basketball Africa League (BAL), ikomeza kugira amahirwe yo kugera muri ½ cy’irangiza cya FIBA Intercontinental Cup.