RSSB Tigers yasezerewe na NBA G League United muri ½ cya FIBA Intercontinental Cup
RSSB Tigers yasezerewe muri FIBA Intercontinental Cup 2026 nyuma yo gutsindwa na NBA G League United amanota 114-95 muri ½. Ikipe yo muri Amerika yahise igera ku mukino wa nyuma ku nshuro ya gatatu yikurikiranya.
RSSB Tigers yatwaye Basketball Africa League (BAL), yasezerewe muri FIBA Intercontinental Cup 2026 nyuma yo gutsindwa na NBA G League United amanota 114-95 muri ½ cy'irangiza, ku wa Gatandatu tariki ya 26 Nzeri 2026.
Uyu mukino wabereye muri National Indoor Stadium i Beijing mu Bushinwa, watangiye saa 15:30 ku isaha y'i Beijing, ni ukuvuga saa 09:30 z'igitondo mu Rwanda. Gutsindwa kwatumye RSSB Tigers itakaza amahirwe yo gukina umukino wa nyuma w'iri rushanwa.
RSSB Tigers ihanganye na NBA G League United muri National Indoor Stadium i Beijing
RSSB Tigers yahanganye mbere yo gusigwa mu gace ka gatatu
RSSB Tigers yatangiye umukino ihanganye cyane na NBA G League United, agace ka mbere karangira iri inyuma ho inota rimwe gusa, 30-31. Mu gace ka kabiri, NBA G League United yongeye gutsinda 25-23, bituma igice cya mbere kirangira iyoboye amanota 56-53.
Umukino wari ukomeje kwegerana, aho wahinduye ikipe iyoboye inshuro zirindwi, amakipe akanganya inshuro eshanu. NBA G League United yaje gufata iya mbere mu gace ka gatatu, igatsinda amanota 29 kuri 17 ya RSSB Tigers, maze amanota yose agera kuri 85-70.
Mu gace ka kane, NBA G League United yakomeje kurusha RSSB Tigers, igatsinda 29-25, umukino urangira ifite amanota 114 kuri 95. Teafale Lenard Jr ni we watsinze amanota menshi muri RSSB Tigers n'amanota 27, mu gihe Lester Quinones yayoboye NBA G League United n'amanota 26.
Umukinnyi wa RSSB Tigers muri ½ cya FIBA Intercontinental Cup i Beijing
RSSB Tigers isigaje guhatanira umwanya wa gatatu
Imibare y'umukino igaragaza ko NBA G League United yinjije 59% by'amanota yose yagerageje, harimo 75.6% ku manota abiri na 37.5% ku manota atatu. RSSB Tigers yo yinjije 48% by'ayo yagerageje, harimo 64.3% ku manota abiri na 37.2% ku manota atatu.
RSSB Tigers yari yageze muri ½ nyuma yo gusoza ku mwanya wa kabiri mu Itsinda A inyuma ya Rytas Vilnius. Muri iryo tsinda, yari yatsinze Shanghai Sharks amanota 117-115 nyuma y'iminota y'inyongera, mu mukino yari yabanje gusigwamo amanota 19 mbere yo kugaruka.
NBA G League United yahise igera ku mukino wa nyuma wa FIBA Intercontinental Cup ku nshuro ya gatatu yikurikiranya. Muri ½ ya kabiri, Rytas Vilnius irakina na Boca Juniors kuri uyu wa Gatandatu saa 19:30 ku isaha y'i Beijing, saa 13:30 mu Rwanda. Ikipe izatsinda uwo mukino ni yo izahura na NBA G League United ku mukino wa nyuma, naho izatsindwa ikazahura na RSSB Tigers mu mukino wo guhatanira umwanya wa gatatu ku Cyumweru, tariki ya 27 Nzeri 2026.
Amafoto y’umukino