Rwabigwi na Kayibanda bakina mu Bwongereza bageze i Kigali bitabiriye umwiherero w’Amavubi U23
Abakinnyi babiri b’Abanyarwanda bakina mu Bwongereza, Kayibanda Claude Smith wa Bedford Town FC na Michael Rwabigwi wa Westfield FC, bageze i Kigali kuri uyu wa Gatanu, tariki ya 6 Ugushyingo 2026, aho baje gusanga bagenzi babo mu Ikipe y’Igihugu y’Abatarengeje imyaka 23 (Amavubi U23), iri kwitegura imikino yo gushaka itike y’Igikombe cya Afurika.
Ishyirahamwe ry’Umupira w’Amaguru mu Rwanda (FERWAFA) ryatangaje ko aba bakinnyi bombi bageze mu Rwanda kugira ngo bifatanye n’abandi mu myiteguro y’imikino ibiri Amavubi U23 azahuramo na Cameroun mu cyiciro cya kabiri cy’amajonjora y’Igikombe cya Afurika cy’Abatarengeje imyaka 23.
Amavubi U23, atoza na Eric Nshimiyimana, yatangiye umwiherero ku wa Kane, tariki ya 5 Ugushyingo 2026, mu rwego rwo kwitegura iyi mikino izaba ikomeye mu rugendo rwo gushaka itike y’iri rushanwa.
U Rwanda ruzakira Cameroun mu mukino ubanza uteganyijwe ku wa 11 Ugushyingo 2026 kuri Kigali Pelé Stadium, mbere yo kujya gukina umukino wo kwishyura ku wa 17 Ugushyingo i Yaoundé muri Cameroun.
Amavubi U23 yageze muri iki cyiciro nyuma yo gusezerera Sudan ku giteranyo cy’ibitego 4-1. Mu mukino ubanza wabereye i Kigali, u Rwanda rwatsinze ibitego 3-0, mbere yo kunganya na Sudan igitego 1-1 mu mukino wo kwishyura wabereye i Juba muri Sudani y’Epfo.
Ukuza kwa Kayibanda na Rwabigwi kwiyongera ku bakinnyi umutoza Eric Nshimiyimana afite mu mwiherero, mu gihe ikipe ikomeje imyiteguro yo gushaka uko yakwitwara neza imbere ya Cameroun.