Umuhungu wa Cristiano Ronaldo yahamagawe bwa mbere mu ikipe ya Portugal U-17
Cristiano Ronaldo Jr., umuhungu w’imfura wa Cristiano Ronaldo, yahamagariwe bwa mbere mu Ikipe y’Igihugu ya Portugal y’abatarengeje imyaka 17, mu bakinnyi 23 bazitabira imikino yo gushaka itike y’Igikombe cy’u Burayi cy’abatarengeje imyaka 17 kizaba mu 2027.
Cristiano Ronaldo Jr., umuhungu w’imfura w’icyamamare mu mupira w’amaguru Cristiano Ronaldo, yahamagariwe bwa mbere mu Ikipe y’Igihugu ya Portugal y’abatarengeje imyaka 17, mu bakinnyi 23 bazitabira imikino yo gushaka itike y’Igikombe cy’u Burayi cy’abatarengeje imyaka 17 kizaba mu 2027.
Nk’uko ibinyamakuru byo muri Portugal birimo A Bola na Zerozero byabitangaje ku wa 2 Ugushyingo 2026, uyu musore w’imyaka 16, uzwi kandi ku izina rya Cristianinho, yashyizwe ku rutonde rw’abakinnyi 23 bahamagawe n’umutoza Filipe Ramos.
Portugal izatangira imikino yo gushaka itike ihura na Andorra ku wa 11 Ugushyingo, ikurikizeho Bulgaria ku wa 14 Ugushyingo, mbere yo gukina na Serbia ku wa 17 Ugushyingo 2026. Iyi mikino yose izabera mu kigo cy’Ishyirahamwe ry’Umupira w’Amaguru muri Portugal, giherereye i Oeiras.
Cristiano Ronaldo Jr. asanzwe akinira ikipe y’abato ya Al Nassr yo muri Arabie Saoudite, ari na yo se akinira mu ikipe nkuru.
Mbere yo guhamagarwa mu batarengeje imyaka 17, yari yarakiniye Portugal mu byiciro by’abatarengeje imyaka 15 na 16, aho amaze gukina imikino 13, atsinda ibitego bitanu.
Mu batarengeje imyaka 15 yakinnye imikino ine atsinda ibitego bibiri, naho mu batarengeje imyaka 16 akina imikino icyenda atsinda ibitego bitatu.
Nk’uko urubuga PortuGOAL rwabitangaje ku wa 3 Ugushyingo 2026, Cristiano Ronaldo Jr. amaze gutsinda ibitego bitatu mu mikino irindwi yakiniye ikipe y’abatarengeje imyaka 17 ya Al Nassr muri uyu mwaka w’imikino wa 2026/2027.
Cristiano Ronaldo Jr. yavutse ku wa 17 Kamena 2010. Mu rugendo rwe rw’umupira w’amaguru, yagiye anyura mu makipe y’abato arimo aya Juventus na Manchester United, mbere yo kwerekeza muri Al Nassr.
Guhamagarwa kwe muri Portugal U17 ni indi ntambwe mu rugendo rwe rwo gukomeza kuzamuka mu byiciro by’abato, mu gihe akomeje gukurikira inzira ya se, umwe mu bakinnyi bamamaye cyane mu mateka y’umupira w’amaguru.
Ikipe ya Portugal U17 iri mu itsinda rya gatandatu mu mikino yo gushaka itike y’Igikombe cy’u Burayi cya 2027, aho izaba isabwa kurangiza mu myanya ibiri ya mbere kugira ngo ikomeze mu kindi cyiciro.