Ibyo kwitega mu gitaramo ‘Praise Unlimited’ kigiye guhuriza i Kigali ibihangange mu kuramya
Mu gihe habura iminsi ibiri ngo igitaramo mpuzamahanga cya ‘Praise Unlimited’ kibere muri BK Arena, abahanzi n’abagitegura batangaje ko abazacyitabira bazabona igitaramo kizahuriramo ibihangange mu muziki wo kuramya no guhimbaza Imana muri Afurika, hakaririmbwa indirimbo nshya ndetse n’izisanzwe zizahabwa umwihariko.
Iki gitaramo kizaba ku Cyumweru, tariki ya 25 Ukwakira 2026, cyateguwe na Halal Afrika ku bufatanye na Ultimate Music Group ndetse na Authentic Events.
Mu mwihariko w’iki gitaramo, hazaririmbwa indirimbo nshya hamwe n’izisanzwe zizahurirwamo n’abahanzi batandukanye. Abategura iki gikorwa bavuze ko indirimbo isanzwe y’umuhanzi ishobora kuririmbwa afatanyije n’abandi batari bayiririmbyemo mbere.
Muri abo bahanzi harimo Joe Mettle na Grace Charles bo muri Ghana, Lebo Sekgobela na Oncemore Six bo muri Afurika y’Epfo, Evelyn Wanjiru wo muri Kenya, Bella Kombo wo muri Tanzania na Emeka Songsz wo muri Nigeria.
U Rwanda ruzahagararirwa na Israel Mbonyi, Ben & Chance, René & Tracy ndetse na True Promises Ministries.
Mu kiganiro n’itangazamakuru cyabaye mbere y’iki gitaramo, Isaac Boadu Afriyie, uhagarariye Halal Afrika yavuze ko iki gitaramo kitagamije gusa guhuriza hamwe abahanzi bazwi, ahubwo ari umwanya wo gushimira Imana no guhuza Abanyafurika binyuze mu muziki.
Yagize ati:
“Ni umwanya wo guhura n’Imana mu buryo bw’umwuka, ugatuma umuntu azirikana ibyo Imana yamukoreye maze akayihimbaza nta mupaka. Ni n’amahirwe yo gusubiza amaso inyuma, tukareba ibyo twanyuzemo mu myaka ishize, tugakoresha uyu mugoroba tubwira Imana ko tuyikunda, tuyishimira, tuyiramya kandi tuyisenga.”
Yasobanuye ko abazacyitabira bazabona umwanya wo kuririmbana n’abahanzi, gusenga no kuzirikana ibyo Imana yabakoreye, mu gihe amajwi n’amashusho azafatirwa muri iki gitaramo azifashishwa mu kugeza indirimbo zo muri Afurika ku rwego mpuzamahanga.
Isaac Efriye uhagarariye Halal Afrika
Umuyobozi Mukuru wa Authentic Events, Robert Mugabo, yavuze ko bashyize imbaraga mu myiteguro kugira ngo abazacyitabira bazabone igitaramo cyateguwe ku rwego rwo hejuru.
Yagize ati:
“Twebwe nka Authentic Events, turi hano kugira ngo iki gitaramo kigende neza, ndetse tunatume Halal Afrika ikomeza kugaruka hano mu myaka icumi iri imbere, nibabyemera. Iyo ni yo ntego yacu.”
Yakomeje ashimangira ko iki gitaramo kizagaragaza uburyo ibikorwa by’umuziki wo kuramya no guhimbaza Imana bishobora gutegurwa mu buryo bw’umwuga.
Ati:
“Imana yacu ni Imana y’ubudashyikirwa kandi turashaka ko ibyo bigaragarira no mu byo dukora. Ikintu cyadushishikaje mu gukorana na Halal Afrika ni urwego bagezeho mu gutegura ibikorwa byabo, mu mitegurire no mu buryo bwo kubishyira mu bikorwa. Ibyo ni byo twifuza ko abantu bazabona ku Cyumweru.”
Umuyobozi Mukuru wa Authentic Events, Robert Mugabo, asobanura uko iki gitaramo kizakorwa
Ben wo mu itsinda rya Ben & Chance yavuze ko iki gitaramo kizaba umwanya wo kunguka ubumenyi no gufungura amarembo y’imikoranire n’abahanzi bo mu bindi bihugu.
Yagize ati:
“Mu by’ukuri dusanzwe tuzi ko ubwenge ndetse n’ubumenyi burahurwa. Kuba turi kumwe na bo kuri stage tuzaba tubigiraho n’ubundi. Uretse no kuri stage, no mu biganiro bitandukanye tugenda tuganira ku bijyanye n’ubunararibonye bwabo, tukagenda tubakuraho ubwo bumenyi.”
Yakomeje agira ati:
“Turatekereza ko kuba uyu munsi bari hano, ntabwo dushidikanya ko ubutaha tuzisanga ku yandi ma-platforms yo mu bihugu byabo twita ko bikomeye cyangwa biteye imbere mu muziki. Turi hano rero kugira ngo twige ibyo baturusha, tuzabisigarane.”
Israel Mbonyi na we yashimye ubushobozi bwa Halal Afrika bwo guhuza abahanzi basanzwe bafite inshingano zitandukanye, agaragaza ko gushyira hamwe ari byo bishobora kubageza ku bikorwa bikomeye.
Yagize ati:
“Nakunze imikoranire no gushyira hamwe biranga Halal Afrika. Hari bamwe muri twe bitunanira gushyira hamwe ngo tugire ikintu dukora kubera inshingano zitandukanye, ariko Halal Afrika yabashije kuduhuza. Burya itangiriro ry’ibintu ni ugushyira hamwe. Turi hamwe twakora ibitangaza.”
Agasaro Tracy wo mu itsinda rya René & Tracy yavuze ko ari iby’agaciro kuba bagiye guhurira ku rubyiniro n’abahanzi bakomeye bamaze kubaka amazina muri Afurika, ashimangira ko ari amahirwe yo gukorana no kumenyana.
Yagize ati: “Ni iby’agaciro kwibona ku rubyiniro rumwe n’abagabo n’abagore b’Imana nka Joe Mettle, Oncemore Six, Bella Kombo, Grace Charles na Israel Mbonyi. Ni ishema rikomeye gukorana na bo.”
Yashimiye abatangije Halal Afrika, avuga ko iki cyerekezo gituma Afurika irushaho guterwa ishema n’umuziki wo kuramya no guhimbaza Yesu Kristo.
René na we yavuze ko ari umugisha kuba muri iki gikorwa gishyira imbere kuramya no guhimbaza Imana muri Afurika, abahanzi bagahurizwa hamwe n’intego imwe yo kwamamaza Kristo.
Abategura Praise Unlimited batangaje kandi ko iki gitaramo kizaba kirimo umwanya wihariye wo gusengera abazacyitabira, mu rwego rwo kugaragaza ko atari igikorwa cy’umuziki gusa, ahubwo gifite n’intego yo kugeza ubutumwa bwiza ku bantu.
Bavuze ko iki gikorwa kizanafasha kuzamura impano z’abakiri bato, barimo abana bo muri Jumbo Kids, bazahabwa amahirwe yo kugaragara ku rubyiniro mpuzamahanga bafatanyije n’abahanzi bazwi.
Halal Afrika yatangiriye muri Leta Zunze Ubumwe za Amerika mu 2017, ikomereza ibikorwa byayo muri Afurika y’Epfo, mbere yo guhitamo u Rwanda nk’igihugu kizakira iri huriro ry’abahanzi mu 2026.
Abayobozi bayo bavuze ko bahisemo u Rwanda kubera umuco w’ubumwe no gushyira hamwe, indangagaciro bahuriyeho n’icyerekezo cy’uyu muryango.
Igitaramo cya Praise Unlimited kizatangira saa kumi n’imwe z’umugoroba muri BK Arena, amatike akaba aboneka ku rubuga rwa www.ticket.rw cyangwa hakoreshejwe 5131*2#.
Umuhanzi Israel Mbonyi yanyuzwe no guhurira ku rubyiniro n’abahanzi batandukanye bazataramira muri iki gitaramo
Ben asenga mbere yo gutangira ikiganiro n’abanyamakuru
Umuhanzikazi Chance wo mu itsinda Ben & Chance yateguje abazitabira iki gitaramo ko bazishima ku rwego rwo hejuru
Umuhanzi Agasaro Tracy wo mu itsinda René & Tracy ni umwe mu bazatarama muri iki gitaramo
Umuhanzi René wo mu itsinda René & Tracy yashimye abateguye iki gitaramo
Umuhanzi w’Umunya-Ghana Joe Mettle yishimiye gutaramira Abanyarwanda
Umuhanzikazi w’Umunyafurika y’Epfo Lebo Sekgobela yishimiye gutaramira mu Rwanda bwa mbere
Umuhanzi w’Umunyafurika y’Epfo Oncemore Six ni umwe mu bazataramira abitabiriye igitaramo
Umuhanzikazi w’Umunyakenya Evelyn Wanjiru ni umwe mu bazataramira abitabiriye iki gitaramo
Umuhanzikazi w’Umunya-Tanzania Bella Kombo yishimiye kongera gutaramira mu Rwanda
Umuhanzi w’Umunya-Nigeria Emeka Songz ni umwe mu bazataramira abitabiriye igitaramo
David Bayingana ni we wayoboye umuhango wo gutangaza ku mugaragaro igitaramo cya Praise Unlimited