Bellingham yagaragaye yambaye imyenda y’imbere gusa mu kwamamaza Calvin Klein
Umukinnyi wa Real Madrid n’ikipe y’Igihugu y’u Bwongereza, Jude Bellingham, yagaragaye mu mafoto n’amashusho bishya byo kwamamaza imyenda y’imbere y’uruganda Calvin Klein, mu gikorwa cyashyizwe ahagaragara ku wa Mbere, tariki ya 2 Ugushyingo 2026.
Uyu mukinnyi w’imyaka 23 yagaragaye yambaye ubwoko butandukanye bw’imyenda y’imbere ya Calvin Klein, mu bukangurambaga bwo kumenyekanisha icyiciro cy’imyenda cyitwa Icon Cotton Stretch.
Amafoto n’amashusho byafatiwe i Madrid muri Kanama 2026, bifatwa n’umufotozi akaba n’umuyobozi w’iki gikorwa, Oliver Hadlee Pearch.
Mu mafoto yashyizwe ahagaragara, Bellingham agaragara mu buryo butandukanye, harimo n’ifoto ahagaze arambuye amaboko yombi, mu buryo busa n’ubwo yishimira igitego yatsinze.
Calvin Klein yavuze ko ubu bukangurambaga bushingiye ku gitekerezo cy’uko icyizere umuntu yifitiye gitangirira ku kuba yumva yisanzuye uko ari.
Bellingham yavuze ko yishimiye gukorana n’uru ruganda, by’umwihariko igitekerezo cyatanzwe muri ubu bukangurambaga.
Yagize ati:
“Icyizere gitangirira ku kuba umuntu yumva yisanzuye uko ari.”
Yongeyeho ko Calvin Klein ari ikirango gikomeye, bityo akaba yarishimiye amahirwe yo kugaragaza icyo gitekerezo mu buryo bwe.
Muri ubu bukangurambaga, Bellingham yamamaza imyenda irimo Icon Cotton Stretch Shine Trunk, ifite umukandara mushya ufite ibara rirabagirana, hamwe n’ubundi bwoko bw’imyenda y’imbere irimo Boxer Brief, Low Rise Trunk, Hip Brief na Slim Boxer.
Mbere y’uko aya mafoto ashyirwa ahagaragara, Calvin Klein yari yaratangaje amashusho magufi atagaragaza isura y’umuntu yari igiye gukorana na we. Ibi byatumye bamwe mu bakurikirana uru ruganda ku mbuga nkoranyambaga batangira gukeka ko uwo muntu ari Bellingham.
Ubu bukangurambaga ni bwo bwa mbere Bellingham akoranye na Calvin Klein, ariko si ubwa mbere agaragaye mu kwamamaza imyenda y’imbere. Muri Kamena 2024, yari yarakoranye n’uruganda SKIMS rwashinzwe n’umunyamerikakazi Kim Kardashian.
Bellingham yiyongereye ku bandi bantu b’ibyamamare bakoranye na Calvin Klein mu kwamamaza imyenda y’imbere, barimo abakinnyi b’umupira w’amaguru Virgil van Dijk, Son Heung-min na Trent Alexander-Arnold.
Amafoto n’amashusho y’ubu bukangurambaga yatangiye kwerekanwa ku mbuga nkoranyambaga za Calvin Klein, ku rubuga rwayo no mu maduka yayo hirya no hino ku isi guhera ku wa 2 Ugushyingo 2026.