Diamond Platnumz yemeje ko agiye gusohora indirimbo nshya yakoranye na The Ben
Umuhanzi w’icyamamare wo muri Tanzania, Diamond Platnumz, yemeje ko afite indirimbo nshya yakoranye n’Umunyarwanda The Ben, avuga ko izagera hanze vuba cyane. Aya makuru atangajwe mu gihe bombi bageze muri Uganda, aho bitegura kuririmba mu gitaramo cyo kwizihiza imyaka icumi ya Comedy Store Uganda.
Diamond yabitangaje ubwo yari ageze ku Kibuga cy’Indege Mpuzamahanga cya Entebbe, aho yabajijwe igihe indirimbo yakoranye na The Ben izasohokera, agasubiza ko ari vuba cyane.
Nubwo yemeje ko iyo ndirimbo ihari, ntiyatangaje itariki nyayo izasohokeraho cyangwa ibindi bisobanuro byayo.
Aba bahanzi bombi bageze muri Uganda ku mugoroba wo ku wa Kane, tariki ya 29 Ukwakira 2026, aho The Ben yari yahagurutse i Kigali ari kumwe n’itsinda rimufasha mu muziki, mu gihe Diamond yari avuye muri Tanzania.
Bakiriwe ku Kibuga cy’Indege cya Entebbe na Alex Muhangi, utegura ibitaramo bya Comedy Store Uganda.
Biteganyijwe ko Diamond Platnumz na The Ben bazataramira abakunzi babo mu gitaramo cyo kwizihiza imyaka icumi ya Comedy Store Uganda, kizabera kuri Lugogo Cricket Oval i Kampala, ku wa Gatanu, tariki ya 30 Ukwakira 2026.
Iki gitaramo cyari cyarabanje gutegurwa ku wa Gatanu, tariki ya 5 Kamena 2026, ariko kiza gusubikwa kubera impungenge z’ubuzima rusange n’ingamba zo kwirinda Ebola.
Mbere y’igitaramo nyamukuru, hari hateguwe igikorwa cyihariye cyo guhura n’abahanzi cyagombaga kubera muri Kampala Marriott Hotel ku wa Kane, tariki ya 29 Ukwakira 2026.
Icyo gikorwa cyari giteganyijwemo Diamond Platnumz, The Ben na Lil Stunner, ariko kiza gusubikwa mu buryo butunguranye, nta mpamvu y’icyo cyemezo yatangajwe.
Mu gitaramo nyamukuru cya Comedy Store @10, biteganyijwe ko aba bahanzi bazataramana n’abandi bazwi mu karere, barimo Eric Omondi wo muri Kenya, Rema, Sheebah, Spice Diana, Fik Fameica, Winnie Nwagi na Lydia Jazmine bo muri Uganda.
Hazagaragaramo kandi abanyarwenya barimo Madrat & Chiko, Maulana & Reign na Salvador.
Amatike y’iki gitaramo yashyizwe ku mashilingi ya Uganda 30.000 ku myanya isanzwe, ibihumbi 100 ku myanya y’icyubahiro, mu gihe ameza yihariye ari hagati ya miliyoni imwe na miliyoni eshatu z’amashilingi.
Ku bijyanye n’imikoranire ya Diamond Platnumz na The Ben, aba bahanzi si ubwa mbere bahuriye mu mushinga w’indirimbo.
Muri Mutarama 2022, basohoye indirimbo bahuriyemo yitwa Why, yabaye imwe mu bikorwa by’umuziki byabahuje.
Diamond Platnumz akikijwe n’abafana bazamuye telefoni bamufata amashusho ubwo yari ageze muri Uganda mbere y’igitaramo cya Comedy Store @10.
Bombi banaririmbiye hamwe mu birori bya Trace Awards byabereye i Kigali mu 2023, ndetse bongera guhurira ku rubyiniro muri Uganda mu 2025.
Muri Kanama 2026, Diamond yari yatangaje ko yifuza kuririmbana na The Ben indirimbo Why mu gitaramo cyabereye i Kigali, ariko The Ben yari afite indi gahunda muri Uganda.
Kwemeza ko hari indi ndirimbo nshya bakoranye bije nyuma y’iyo mikoranire, mu gihe abakunzi babo bagitegereje kumenya igihe izashyirirwa ahagaragara.
Diamond Platnumz agenda ku kibuga cy’indege yerekeza ku ndege yihariye, mu masaha ya nimugoroba.