Element Eleéeh yateguje amashusho y’indirimbo “My Dear” ikomeje kubica
Umuhanzi akaba n’umutunganyamuziki w’Umunyarwanda, Mugisha Fred Robinson uzwi nka Element Eleéeh, yateguje abakunzi b’umuziki amashusho y’indirimbo ye “My Dear”, nyuma y’ukwezi kurenga iyi ndirimbo isohotse igakundwa n’abatari bake.
Kuri uyu wa Mbere, tariki ya 26 Ukwakira 2026, Element Eleéeh yashyize kuri Instagram amafoto agaragaza imyambarire n’imiterere mishya y’uburyo azaba agaragara mu mashusho y’indirimbo “My Dear”.
Yayaherekeresheje amagambo agira ati: “MY DEAR 🎥 Loading...”, aca amarenga ko amashusho y’iyi ndirimbo ari mu nzira.
Aya mafoto yafashwe na TheMind Production kiri no mu bari mu mitunganyirize y’uyu mushinga, itsinda rikora ibijyanye no gufotora, gutunganya amashusho no guhanga ibihangano by’amashusho.
Nubwo yagaragaje ko amashusho ya “My Dear” ategerejwe, Element Eleéeh ntiyatangaje itariki nyirizina azasohokeraho.
Iyi ndirimbo yasohotse ku wa 17 Nzeri 2026, ibanza kujya hanze mu buryo bw’amajwi aherekejwe n’amashusho agaragaza amagambo yayo (lyric video). Kuva icyo gihe, yakomeje kwitabwaho n’abakunzi b’umuziki, iza no kugaragara mu myanya ya mbere ku rutonde rw’indirimbo zikunzwe mu Rwanda.
“My Dear” ni indirimbo ifite ubutumwa bushingiye ku rukundo, gukumbura umuntu ukunda no gukomeza kumwereka ko agifite umwanya ukomeye mu buzima bwawe nubwo mwaba mutari kumwe.
Iyi ndirimbo yashimangiye urugendo rwa Element Eleéeh rwo kwagura ibikorwa bye nk’umuhanzi uririmba, nyuma y’imyaka azwi cyane mu gutunganya indirimbo z’abandi bahanzi.
“My Dear” ni indirimbo ifite ubutumwa bushingiye ku rukundo
Muri Kamena 2026, yari yashyize hanze umuzingo w’indirimbo (EP) yise “GENESIS”, ugizwe n’indirimbo esheshatu zirimo “Kashe”, “Tombé”, “MAASO” na “Fou De Toi” yakoranye na Bruce Melodie na Rosskana.
Amashusho ya “My Dear” ategerejwe mu gihe iyi ndirimbo ikomeje kugira abakunzi benshi, bikaba bishobora kuyongerera imbaraga no kuyigeza ku bandi bakunzi b’umuziki.
Uku niko Element azaba agaragara mu mashusho y’indirimbo “My Dear”