Israel Mbonyi n’Inganzo Ngari bataramiye abitabiriye Gen-Z Comedy, urwenya rwuzuzanya n’umuziki

Eric Niyongira ·

Israel Mbonyi aganira na Fally Merci muri Gen-Z Comedy Show

Igitaramo cya Gen-Z Comedy Show cyabereye i Camp Kigali ku wa Kane, tariki ya 12 Ugushyingo 2026, cyahurije hamwe urwenya, imbyino gakondo n’indirimbo zo guhimbaza Imana, umuhanzi Israel Mbonyi wari umushyitsi mukuru aririmbana n’abitabiriye nyuma yo kuganira na Fally Merci.

Iki gitaramo cyabereye muri Kigali Conference and Exhibition Village, kizwi nka Camp Kigali, cyatangiye saa kumi n’ebyiri z’umugoroba, kitabirwa ku biciro bya 5 000 Frw mu myanya isanzwe (Regular), 10 000 Frw muri VIP na 20 000 Frw muri VVIP.

Gen-Z Comedy Show ni igitaramo cy’urwenya cyatangijwe n’umunyarwenya Fally Merci, amazina ye nyakuri akaba Merci Ndaruhutse. Gitegurwa kabiri mu kwezi, ku wa Kane, kikaba cyari cyatewe inkunga na MTN Yolo, mu gihe Vitalo na yo yari mu baterankunga.

Igitaramo cyari kigabanyijemo ibice bibiri. Icya mbere cyayobowe n’umunyarwenya Muhinde, mu gihe icya kabiri cyayobowe na Fally Merci, ari na we waganiriye n’umushyitsi mukuru w’uwo mugoroba.

Mu banyarwenya banyuze ku rubyiniro harimo Koporo, Jonathan Wacu, Biden Seka, Nkirigito Clement, Uncle Ndegesi ndetse n’itsinda ry’abanyarwenya rizwi nka Impuguke Nyazo.

Mc Kandii na Musa na bo basusurukije abitabiriye binyuze mu rwenya rugaragaza ubuzima bw’abashakanye bo muri iki gihe. Itsinda Masomo Comedy na ryo ryasusurukije abari aho, ku nshuro ya mbere rigeze ku rubyiniro rwa Gen-Z Comedy.

Urwenya rwatangwaga ku rubyiniro rwaherekezwaga n’ubusemuzi mu rurimi rw’amarenga, aho umusemuzi yafashaga abafite ubumuga bwo kutumva gukurikira ibyavugwaga n’abanyarwenya.

Kimwe mu bice byari byitezwe muri iki gitaramo ni icy’umuhanzi w’indirimbo zihimbaza Imana, Israel Mbonyi, wari wongeye kugaruka muri Gen-Z Comedy nyuma y’uko yari yarahageze mbere.

Abategura iki gitaramo bari bamamaje ko Mbonyi agarutse, banatangaza ko uwo mugoroba uzaba uwo guhimbaza no kuramya Imana.

Mbonyi yabanje kugirana ikiganiro na Fally Merci mu gice cyitwa “Meet Me Tonight”, mbere yo gufata gitari akaririmba indirimbo zo guhimbaza Imana.

Ubwo yari arimo kuririmba acuranga gitari, abitabiriye igitaramo bahagurutse baririmbana na we, bahimbaza Imana, bituma urwenya rwari rwaranze umugoroba ruhurira hamwe n’umwanya wo kuramya no guhimbaza Imana.

Usibye urwenya n’indirimbo zo guhimbaza Imana, itorero Inganzo Ngari ryageze ku rubyiniro ribyina imbyino gakondo, rinaboneraho kwamamaza igitaramo cyaryo cyiswe “Umurage w’Intore – Imyaka 20 mu Nganzo”.

Icyo gitaramo giteganyijwe kubera muri BK Arena ku wa 21 Ugushyingo 2026, kikazaba ari umwanya wo kwizihiza imyaka 20 iri torero rimaze rishinzwe, kuva mu 2006.

Mbonyi yari umutumirwa mu cyiciro cya ‘Meet Me Tonight’

Umuhanzi Sicha na we yagaragaye muri Gen-Z Comedy, aririmba mu buryo bwa live indirimbo “Ni Umuhororo”.

Umunyamakuru akaba n’umushyushyarugamba Ally Soudy na we yageze ku rubyiniro, aboneraho gutumira abantu mu gitaramo cye “Cabaret Kigali”, giteganyijwe ku wa 28 Ugushyingo 2026.

Muhinde wayoboye igice cya mbere cy’igitaramo ari ku rubyiniro

Sicha aririmba live indirimbo “Ni Umuhororo”

Mc Kandii na Musa basetsa abitabiriye bagaragaza ubuzima bw’abashakanye

Itorero Inganzo Ngari ribyina imbyino gakondo

Umwe mu babyinnyi b’Itorero Inganzo Ngari

Ally Soudy yatumiye abantu mu gitaramo cye “Cabaret Kigali”

Fally Merci na Israel Mbonyi mu gice cyiswe “Meet Me Tonight”

Israel Mbonyi aririmba acuranga gitari

Abitabiriye bahagurutse baririmbana na Israel Mbonyi

Ibyishimo byari byose mu bitabiriye Gen-Z Comedy

IBANZE.com

Fungura JavaScript kugira ngo ukoreshe urubuga rwose.

Subira ahabanza