Ikiraro cya Mwogo gihuza uturere dutatu kigeze kure cyubakwa

Bruno I. Bagambiki ·

Ikiraro cya Mwogo gihuza uturere dutatu kigeze kure cyubakwa

Imirimo yo kubaka ikiraro cya Mwogo gihuza Nyamagabe, Nyanza na Ruhango igeze kure cyubakwa, kikaba giteganyijwe kuzura mu ntangiriro za 2027.

Imirimo yo kubaka ikiraro cya Mwogo gihuza uturere twa Nyamagabe, Nyanza na Ruhango igeze ku kigero cya 68%, nk’uko byatangajwe n’Ikigo gishinzwe Iterambere ry’Ubwikorezi mu Rwanda, RTDA.

Iki kiraro kiri kubakwa hejuru y’Umugezi wa Mwogo, mu gishanga cya Mwogo, kikaba kigamije koroshya ingendo n’ubuhahirane hagati y’abaturage bo muri utu turere.

RTDA ivuga ko imirimo yo kucyubaka iteganyijwe kurangira mu ntangiriro za 2027. Nikimara kuzura, kizaba gifite uburebure bwa metero 60 n’ubugari bwa metero 11, ku buryo kizashobora kwikorera ibinyabiziga n’imizigo bifite uburemere bugera kuri toni 60.

Iki kiraro kitezweho gufasha abaturage kugera ku masoko, amashuri, ibigo nderabuzima n’izindi serivisi z’ingenzi mu buryo bworoshye. Kizanafasha abahinzi kugeza umusaruro wabo ku masoko, bityo guteza imbere ubucuruzi n’ubukungu bw’icyaro.

Imirimo yo kucyubaka yatangiye muri Mutarama 2024, ikaba yari iteganyijwe kurangira muri Gicurasi 2025, ariko igihe ntarengwa nticyubahirizwa. Umushinga wari warateganyirijwe ingengo y’imari isaga miliyari 1,6 Frw.

Kuzura kw’iki kiraro bizongera uburyo bwo guhuza abaturage n’ibikorwa by’ubukungu hagati y’uturere dutatu, cyane cyane abatuye mu bice by’icyaro.

IBANZE.com

Fungura JavaScript kugira ngo ukoreshe urubuga rwose.

Subira ahabanza