Abayobozi bashya bashyizwe mu myanya muri Sena, MINIJUST, Rwanda FDA, RLRC, NRS na MINALOC
Inama y’Abaminisitiri yashyize mu myanya abayobozi bashya mu nzego zitandukanye za Leta zirimo Sena, Minisiteri y’Ubutabera, Rwanda FDA, Komisiyo y’u Rwanda ishinzwe Ivugururwa ry’Amategeko, Ikigo cy’Igihugu gishinzwe Igororamuco na Minisiteri y’Ubutegetsi bw’Igihugu.
Ibi byemezo byafatiwe mu Nama y’Abaminisitiri yateranye kuri uyu wa Gatanu, tariki ya 18 Nzeri 2026, iyobowe na Perezida Paul Kagame. Mu bashyizwe mu myanya harimo abayobozi bakuru b’ibigo, abanyamabanga bakuru n'abafite inshingano mu mashami atandukanye ya Leta.
Mushimire Olivier yagizwe Umunyamabanga Mukuru wa Sena
Muri Sena y’u Rwanda, Mushimire Olivier yagizwe Umunyamabanga Mukuru. Yari asanzwe ari Umujyanama wa Perezida wa Sena.
Umunyamabanga Mukuru wa Sena agira uruhare mu micungire y’imirimo ya buri munsi y’uru rwego rw’Inteko Ishinga Amategeko no guhuza ibikorwa by’ubuyobozi n’abakozi barwo.
Impinduka muri Minisiteri y’Ubutabera
Muri Minisiteri y’Ubutabera, Umuzayire Burayobera Bibiane yagizwe Umunyamabanga Uhoraho, naho Rwagasana Jean Pierre agirwa Umuyobozi Mukuru ushinzwe Imirimo Rusange.
Umuzayire yari asanzwe ari Visi Perezida wa Komisiyo y’u Rwanda ishinzwe Ivugururwa ry’Amategeko, RLRC.
Prof. Raymond Muganga ayoboye Rwanda FDA
Muri Rwanda FDA, Prof. Raymond Muganga yagizwe Umuyobozi Mukuru, mu gihe Dr. Munyampundu Jean Pierre yagizwe Umuyobozi Mukuru w’Ishami ry’Ibiribwa, naho Dr. Kabandana Monia agirwa Umuyobozi Mukuru w’Ishami rya Serivisi za Laboratwari.
Prof. Muganga yari asanzwe muri Rwanda FDA, aho yayoboye Serivisi za Laboratwari mbere yo kuba Umuyobozi Mukuru w’agateganyo guhera muri Kanama 2026.
Abayobozi bashya muri RLRC, NRS na MINALOC
Muri Komisiyo y’u Rwanda ishinzwe Ivugururwa ry’Amategeko, Izere Parfait yagizwe Visi Perezida, mu gihe Munezero Marie Jeanne na Ngirinshuti Samuel bagizwe ba Komiseri.
Munyaneza Charles yagizwe Umuyobozi Mukuru w’Ikigo cy’Igihugu gishinzwe Igororamuco, NRS. Munyaneza yigeze kuba Umunyamabanga Mukuru wa Komisiyo y’Igihugu y’Amatora, NEC.
Muri Minisiteri y’Ubutegetsi bw’Igihugu, Ingabire Chadia yagizwe Umuyobozi Mukuru ushinzwe Imirimo Rusange.
Izi mpinduka ziri mu byemezo bitandukanye byafashwe n’Inama y’Abaminisitiri yo ku wa 18 Nzeri 2026, yanemeje politiki, amategeko n’amasezerano atandukanye arebana n’iterambere ry’igihugu.
Itangazo ry'Ibyemezo by’Inama y’Abaminisitiri ryo ku wa 18 Nzeri 2026