Abakandida barenga 1,000 nibo bazahatanira kujya mu Nama Njyanama z’Uturere
Komisiyo y’Igihugu y’Amatora, NEC, yatangaje ko abantu barenga 1,000 batanze kandidatire zo kujya mu Nama Njyanama z’Uturere, zinatorwamo abagize Komite Nyobozi y’Akarere, barimo Meya na ba Visi Meya babiri.
Ibi byatangajwe na Perezida wa Komisiyo y’Igihugu y’Amatora (NEC), Oda Gasinzigwa, mu kiganiro n’itangazamakuru, kuri uyu wa Gatanu, tariki ya 23 Ukwakira 2026, mu gihe habura amasaha make ngo amatora y’inzego z’ibanze abe.
Amatora y’inzego z’ibanze azatangira ku wa 24 Ukwakira 2026 ku rwego rw’Umudugudu, akomereze ku wa 31 Ukwakira ku rwego rw’Akagari, ku wa 7 Ugushyingo ku rwego rw’Umurenge, ku wa 14 Ugushyingo habe amatora ya komite nyobozi z’Inama z’Igihugu z’Abagore, Urubyiruko n’Abafite Ubumuga ku rwego rw’Uturere.
Amatora azakomeza ku wa 17 Ugushyingo hatorwe abagore batanu bajya mu Nama Njyanama z’Uturere, ku wa 21 Ugushyingo hatorwe abandi bajyanama, naho ku wa 24 Ugushyingo hatorwe Biro z’Inama Njyanama na Komite Nyobozi z’Uturere.
Inama Njyanama z’Uturere zifite uruhare mu gufata ibyemezo bigamije iterambere ry’uturere no kugenzura imikorere y’inzego z’ibanze. Abazatorwa bazaba bafite inshingano zo guhagararira inyungu z’abaturage no gukurikirana ishyirwa mu bikorwa rya gahunda z’iterambere.
Komisiyo y’Igihugu y’Amatora, NEC, yatangaje ko abantu barenga 1,000 batanze kandidatire zo kujya mu Nama Njyanama z’Uturere
Minisitiri w’Ubutegetsi bw’Igihugu, Dominique Habimana, yashishikarije Abanyarwanda kwitabira amatora y’inzego z’ibanze, azatangira ku wa 24 Ukwakira 2026, ashimangira ko ari amahirwe yo kwihitiramo abayobozi babegereye kandi babakorera buri munsi.
Mu kiganiro yagiranye na RBA, Minisitiri w’Ubutegetsi bw’Igihugu, Dominique Habimana, yasabye abaturage kuzitabira ku bwinshi amatora y’abayobozi b’inzego z’imitegekere y’Igihugu zegerejwe abaturage, agaragaza ko ari umwanya wo kugira uruhare mu miyoborere no guhitamo ababahagararira.
Yagize ati:
“Aya matora ni ay’abaturage, ni amatora y’abayobozi babegereye, babakorera umunsi ku munsi. Icya mbere rero dusaba abaturage ni uko bayitabira ku bwinshi. Abaturage bose bagejeje igihe cyo gutora bitabire amatora. Kuri uyu wa Gatandatu, tariki ya 24 Ukwakira, tuzaba turi gutora ku Mudugudu. Turasaba abaturage ko bazinduka.”
Yakomeje asobanura ko amatora yo ku rwego rw’Umudugudu akorwa abaturage bateraniye hamwe, bagatora binyuze mu kujya inyuma y’umukandida bashyigikiye, mu gihe abashinzwe kuyobora amatora bakurikirana imigendekere yayo.
Minisitiri Habimana yanagaragaje ko abifuza kuyobora mu nzego z’ibanze bakwiye kuba basobanukiwe icyerekezo cy’Igihugu, bafite ubushobozi bwo kuzuza inshingano biyamamarizamo, ndetse n’ubushake bwo gukorera abaturage batagamije inyungu zabo bwite.
Yashimangiye ko kuyobora muri izi nzego bisaba ubwitange, kuko ari inshingano ziha umuntu amahirwe yo gufasha abaturage gukemura ibibazo bibugarije no guteza imbere aho batuye.
Nyuma ya Jenoside yakorewe Abatutsi mu 1994, u Rwanda rwashyize imbaraga mu kongera kubaka inzego z’ubuyobozi no guteza imbere imiyoborere ishingiye ku ruhare rw’abaturage. Amatora y’inzego z’ibanze ni bumwe mu buryo bufasha abaturage kugira ijambo mu ifatwa ry’ibyemezo bibareba.
Minisitiri w’Ubutegetsi bw’Igihugu, Dominique Habimana, yashishikarije Abanyarwanda kwitabira amatora y’inzego z’ibanze