Brazil: Lula yegukanye intsinzi, Bolsonaro yanga kwemera ibyavuye mu matora
Perezida wa Brazil, Luiz Inácio Lula da Silva, yongeye gutorerwa kuyobora iki gihugu ku nshuro ya kane, nyuma yo gutsinda Flávio Bolsonaro, umuhungu w’uwahoze ari Perezida Jair Bolsonaro, mu cyiciro cya kabiri cy’amatora yabaye ku Cyumweru, tariki ya 25 Ukwakira 2026.
Komisiyo y’Amatora ya Brazil (TSE) yatangaje ko Lula w’imyaka 80, uhagarariye Ishyaka ry’Abakozi (PT), yegukanye amajwi 51,79%, angana na 64.256.232, mu gihe Flávio Bolsonaro w’imyaka 45, wo mu Ishyaka Liberal (PL), yabonye 48,21%, angana na 59.826.041.
Iyi ntsinzi ifite umwihariko mu mateka ya Brazil, kuko Lula abaye umukandida wa mbere ubashije gutsinda amatora ya Perezida mu cyiciro cya kabiri nyuma yo gutsindwa mu cya mbere, kuva iki gihugu cyasubira muri demokarasi mu myaka ya 1980.
Mu cyiciro cya mbere cyabaye ku wa 4 Ukwakira 2026, Flávio Bolsonaro yari yarushije Lula amajwi arenga miliyoni ebyiri, ibintu byatumye benshi bibaza niba uyu mukuru w’igihugu yari kongera gutorwa.
Icyakora, mu byumweru bitatu byakurikiyeho, Lula yongereye ibikorwa byo kwiyamamaza, yifashisha cyane imbuga nkoranyambaga n’ibikorwa byamushyigikiraga byitabiriwe n’urubyiruko.
Nyuma yo gutangazwa ko yatsinze, Lula yagejeje ijambo ku baturage bari bateraniye i São Paulo, abashimira uko bitabiriye amatora no guharanira demokarasi.
Yagize ati: “Aya matora yabaye ugutsindwa kw’abahakana ukuri n’ibinyoma.”
Yashimiye by’umwihariko urubyiruko rwamushyigikiye, avuga ko abaturage ba Brazil bagaragaje ko bafite ubushobozi bwo kwihitiramo ubuyobozi bwabo.
Nubwo Lula yatsinze, uwo bari bahanganye, Flávio Bolsonaro, yanze kwemera ibyavuye mu matora, avuga ko azitabaza ubutabera asaba ko ateshwa agaciro.
Bolsonaro yavuze ko icyemezo cy’Urukiko rw’Ikirenga cyo kongera amasaha abiri yo gutora, bitewe n’ibibazo byagaragaye mu ngendo rusange, kitari gikwiye gufatwa. Yagaragaje ko icyo cyemezo gituma ashidikanya ku migendekere y’amatora.
Gusa Komisiyo y’Amatora yemeje intsinzi ya Lula, igaragaza ko Abanyabrazil basaga miliyoni 128 bitabiriye aya matora, bangana na 80,8% by’abari bemerewe gutora.
Flávio Bolsonaro ni umuhungu mukuru wa Jair Bolsonaro, wayoboye Brazil kuva mu 2019 kugeza mu 2022, mbere yo gutsindwa na Lula. Jair Bolsonaro yakatiwe igifungo cy’imyaka 27 nyuma yo guhamywa uruhare mu mugambi wo guhirika ubutegetsi wari ugamije kuguma ku butegetsi nyuma yo gutsindwa mu matora yo mu 2022.
Intsinzi ya Lula yakiriwe n’ibyishimo n’abamushyigikiye, mu gihe abayobozi batandukanye ku Isi, barimo abo muri Mexique, Canada, Espagne n’Umuryango w’Ubumwe bw’u Burayi, bamushimiye.
Iyi ntsinzi kandi ifite uburemere muri politiki mpuzamahanga, kuko Flávio Bolsonaro yari ashyigikiwe n’abanyapolitiki begereye Perezida wa Leta Zunze Ubumwe za Amerika, Donald Trump, mu gihe Lula akomeje gushyira imbere ubusugire bwa Brazil n’ubufatanye n’ibihugu bitandukanye, birimo u Bushinwa.
Lula yabaye Perezida wa Brazil bwa mbere kuva mu 2003 kugeza mu 2011, yongera gutorwa mu 2022. Manda nshya y’imyaka ine yatorewe izatangira ku wa 5 Mutarama 2027.
Nubwo yatsinze, azakomeza guhangana n’ibibazo birimo ubukungu, imyenda ya Leta n’Inteko Ishinga Amategeko irimo abanyapolitiki benshi batavuga rumwe n’ishyaka rye.