CNN, Politico na MS NOW bareze Trump nyuma yo kubuzwa kwinjira muri White House
Ibigo bitatu bikomeye by’itangazamakuru muri Leta Zunze Ubumwe za Amerika, CNN, Politico na MS NOW, byareze Perezida Donald Trump n’ubuyobozi bwe, bisaba urukiko kubisubiza uburenganzira bwo kwinjira no gukorera muri White House, nyuma y’uko abanyamakuru babyo bambuwe uburenganzira bwo kuhakorera.
Iki kirego cyatanzwe kuri uyu wa Mbere, tariki ya 21 Nzeri 2026, mu rukiko rwa Federal District Court i Washington D.C. Ibi bitangazamakuru bivuga ko icyemezo cyo kubikumira muri White House kinyuranyije n’Ivugururwa rya Mbere ry’Itegeko Nshinga rya Amerika (First Amendment) rirengera ubwisanzure bwo gutanga ibitekerezo n’ubw’itangazamakuru, ndetse n’Ivugururwa rya Gatanu (Fifth Amendment) ku bijyanye no kudafatirwa icyemezo hatabanje gukurikizwa inzira ziteganywa n’amategeko.
CNN, Politico na MS NOW bavuze ko bafashe icyemezo cyo kujya mu nkiko nyuma y’uko White House ihagaritse impushya z’abanyamakuru babo nta kubamenyesha cyangwa kubaha uburyo bwo kujurira. Mu itangazo bahuriyeho bagize bati:
“Twatanze ikirego kugira ngo turengere uburenganzira duhabwa n’Itegeko Nshinga ndetse n’ihame ry’uko Leta atari yo igena ibyo itangazamakuru ritangaza.”
Trump yari yatangaje ku wa Gatanu ko CNN, MS NOW na Politico zibujijwe kwinjira muri White House, azishinja gutangaza ibyo yise “fake news” cyangwa se "inkuru mpimbano", avuga ko zimaze igihe zimutangazaho amakuru abona ko atari ukuri. Bukeye bwaho, abanyamakuru b’ibi bigo bageze kuri White House basanga impushya zabo zahagaritswe, bamwe banamburwa amakarita yabemereraga kuhakorera.
Ku ruhande rw’ibitangazamakuru, bivuga ko kuba ubuyobozi bushobora kwima umunyamakuru uburenganzira bwo kugera muri White House kubera kutishimira inkuru yatangaje byateza ikibazo ku bwigenge bw’itangazamakuru. Mu kirego cyabyo, bivuga ko icyemezo cyafashwe kubera inkuru zabyo, bityo bigasaba urukiko kugihagarika by’agateganyo mu gihe urubanza rugikurikiranwa.
Iki kibazo cyagize ingaruka no kuri gahunda isanzwe izwi nka "White House press pool," aho itsinda rito ry’abanyamakuru rihabwa uburenganzira bwo gukurikiranira Perezida hafi, rigasangiza amakuru, amashusho n’amafoto ibindi bitangazamakuru. Nyuma y’uko CNN ibujijwe gukora inshingano zayo muri iyo gahunda, ibindi bigo bya televiziyo birimo ABC, CBS, NBC na Fox byahagaritse by’agateganyo gutanga amashusho binyuze muri iyo gahunda.
Trump we yakomeje gushyigikira icyemezo cye, avuga ko ashyigikiye ubwisanzure bw’itangazamakuru ariko ko adashyigikiye ibyo afata nk’amakuru y’ibinyoma. CNN, Politico na MS NOW zo zivuga ko kutemeranya n’uburyo ikinyamakuru gitangaza amakuru bidakwiye kuba impamvu yo kukibuza kugera ku bikorwa bya Perezida.
Urubanza rwashyikirijwe umucamanza wo ku Rwego rw'Igihugu i Washington, mu gihe ibi bigo bisaba ko urukiko rwihutisha icyemezo cy’agateganyo cyatuma abanyamakuru babyo bongera kwemererwa kwinjira muri White House mu gihe urubanza rugikomeje.
Iki kirego kibaye ikindi cyiciro mu makimbirane amaze igihe hagati ya Trump n’ibitangazamakuru bimwe na bimwe byo muri Amerika, aho impaka ahanini zishingiye ku mipaka y’ububasha bwa White House mu kugena abanyamakuru bayigeramo n’uburenganzira butangwa n’Itegeko Nshinga ku itangazamakuru.