Ingendo zo mu kirere muri Amerika zegereje gusubira ku murongo usanzwe nyuma y’ihungabana

Yvan Mukiza ·

Ingendo zo mu kirere muri Amerika zegereje gusubira ku murongo usanzwe nyuma y’ihungabana

Minisitiri ushinzwe ubwikorezi muri Leta Zunze Ubumwe za Amerika, Sean Duffy, yatangaje ko ingendo z’indege zegereje kongera gukora ku kigero gisanzwe, nyuma y’iminsi irangwa n’ihungabana ryateje ibibazo ku bagenzi n’ibibuga by’indege.

Ibibazo byatangiye ku wa Gatanu, tariki ya 13 Ugushyingo 2026, ubwo Ikigo gishinzwe iby’indege muri Amerika (FAA) cyategekaga ko indege zihagarika guhaguruka mu gihugu hose mu gihe cy’amasaha arenga ane.

Icyo cyemezo cyafashwe nyuma y’uko habonetse ikibazo mu bikoresho by’ikoranabuhanga bikoreshwa mu itumanaho no gukurikirana indege, byatumye abashinzwe umutekano wo mu kirere badashobora gukurikirana neza amakuru amwe n’amwe.

Iperereza ryagaragaje ko ikibazo gishobora kuba cyaraturutse ku bikorwa byo kuvugurura uburyo bw’itumanaho, aho insinga za kera z’umuringa zasimburwaga n’izikoresha ikoranabuhanga rya Fibre Optic.

Mu gihe ibyo bikorwa byakorwaga mu gace ka El Dorado muri Leta ya Arkansas, kimwe mu bikoresho bizwi nka Router cyohereje amakuru menshi mu muyoboro w’itumanaho, bituma ibindi bikoresho birengerwa n’ayo makuru.

Ikibazo cyagize ingaruka no ku bikoresho byo mu gace ka Amarillo muri Texas, bituma FAA ifata icyemezo cyo guhagarika ingendo z’indege mu rwego rwo kurinda umutekano w’abagenzi.

Iri hagarikwa ryateje akavuyo ku bibuga by’indege bitandukanye muri Amerika, aho abagenzi benshi bagiye bahura no gusubikirwa ingendo, abandi bahagarara ku bibuga by’indege bategereje ibisubizo ku ngendo zabo.

Imibare yatangajwe n’ibitangazamakuru byo muri Amerika yagaragazaga ko indege zirenga 17,000 zari zimaze guhagarikwa kuva ikibazo cyatangira, mu gihe izindi nyinshi zari zatindijwe.

Hari abagenzi basigaye mu ndege zari ziparitse ku kibuga, mu gihe abandi byabaye ngombwa ko barara ku bibuga by’indege bategereje ko ingendo zabo zisubukurwa.

Izi ngaruka ntizagarukiye muri Amerika gusa kuko hari n’indege zahagurukaga mu Bwongereza no mu bindi bihugu by’u Burayi zagize impinduka bitewe n’ihungabana ryari ryabaye muri gahunda z’ingendo zo muri Amerika.

Ku Cyumweru, tariki ya 15 Ugushyingo 2026, Sean Duffy yagiranye ikiganiro na CBS News, avuga ko gahunda z’ingendo zari zitangiye gusubira ku murongo kandi ko yizeraga ko indege zizongera gukora ku kigero gisanzwe mbere y’uko umunsi urangira cyangwa ku wa Mbere.

Yasobanuye ko nubwo ikibazo cy’ikoranabuhanga cyari cyakemuwe, byari kugorana guhita basubira ku murongo kubera indege n’abakozi bari basigaye ahantu hatari ho bagombaga kuba bari.

Yagize ati: “Dufite indege n’abakozi bari ahantu hatari ho, bityo bisaba igihe kugira ngo amasosiyete y’indege abagarure kuri gahunda isanzwe.”

Sosiyete ya American Airlines yatangaje ko yiteguye gusubukura gahunda z’ingendo zisanzwe ku wa Mbere, mu gihe Delta Airlines yavuze ko ingendo nyinshi zari zisubiye mu buryo busanzwe, nubwo bamwe mu bagenzi bashoboraga gukomeza guhura no gutinda cyangwa guhagarikirwa ingendo.

Duffy yatangaje ko inzego zibishinzwe zikomeje gukora iperereza kugira ngo hamenyekane neza icyateye ikibazo, harimo kureba niba cyaratewe n’igikoresho cyari gifite ikibazo cyangwa uburyo cyashyizwemo.

Yavuze ko FBI na yo yari yemeye gufasha muri iryo perereza, ariko ko kugeza icyo gihe nta bimenyetso byagaragazaga ko ari igitero cy’ikoranabuhanga cyaturutse hanze ya Amerika.

Ibi byongeye kugaragaza intege nke z’ibikoresho by’itumanaho bikoresha mu kugenzura ingendo zo mu kirere muri Amerika, aho bimwe muri byo bimaze imyaka myinshi bikoreshwa.

Perezida Donald Trump na Sean Duffy bagaragaje ko hakenewe amafaranga menshi yo kuvugurura uburyo bwo kugenzura indege, Duffy asaba Kongere gutanga miliyari 50 z’amadolari yo gukomeza uwo mushinga.

Iri hungabana ryabaye mu gihe Amerika yiteguraga igihe cy’ibiruhuko bya Thanksgiving, aho abantu benshi baba bitegura gukora ingendo zo gusura imiryango yabo.

Biteganyijwe ko gusubira ku murongo bisanzwe bizafasha kugabanya ibibazo by’abagenzi no gukumira izindi mpinduka mu ngendo z’indege mu minsi ikurikira.

IBANZE.com

Fungura JavaScript kugira ngo ukoreshe urubuga rwose.

Subira ahabanza