Kaminuza ya Jomo Kenyatta yanyomoje umudepite wo muri Kenya wabeshye ko yayizemo
Kaminuza y’Ubuhinzi n’Ikoranabuhanga ya Jomo Kenyatta, JKUAT, yatangaje ko umudepite Didmus Barasa, atigeze aba umunyeshuri muri iyi kaminuza kandi ko itamuhaye impamyabumenyi y’icyiciro cya kabiri cya kaminuza mu by’amashanyarazi n’ikoranabuhanga muri Gicurasi 2008.
Mu ibaruwa yo ku wa 14 Nzeri 2026, Umuyobozi ushinzwe iby’amasomo muri JKUAT, Dr. Aggrey Wanyama, yatangaje ko izina rya Barasa ritagaragara na hamwe mu nyandiko zabo zigaragaza abanyeshuri baryizemo.
Ishyirahamwe Rirengera Abaguzi muri Kenya, COFEK, ryatanze ikirego mu Rukiko Rukuru rwa Milimani rihakana ko impamyabumenyi y'ikirenga y'uyu mudepite aherutse gutangaza ari iy'ukuri banasaba ko Komisiyo ishinzwe Uburezi bwa Kaminuza muri Kenya, CUE, n'Ubuyobozi bw'Iperereza ku Byaha, DCI, bakora iperereza ku mugaragaro.
Mu rwego rw'iperereza ryabo ryagutse, hakozwe iperereza ku bumenyi bwa Barasa bwo muri kaminuza bugaragaza ko impamyabumenyi y'icyiciro cya kabiri cya kaminuza yayikuye muri JKUAT nk’uko bigaragara mu mwirondoro we wanditse wemewe n'Inteko Ishinga Amategeko.
Iyi kaminuza yahise itanga itanga igisubizo kitaziguye ku Ishyirahamwe Rirengera Abaguzi muri Kenya, COFEK, kugira ngo itange icyemezo cyemewe n'amategeko cyemeza ko atigeze aba umunyeshuri wabo.
Didmus Barasa yatangaje ko yarangije neza amasomo ye y’icyiciro cya gatatu cya kaminuza, PhD, mu mpera za Kamena 2026, avuga ko yasoje gahunda y’imyaka itatu mu bijyanye n’Imicungire y’Imirimo ya Leta (Public Administration) muri Kaminuza y’Ikoranabuhanga ya Murang'a, yahawe iyi mpamyabumenyi y’ikirenga ku mugaragaro mu muhango wo gutanga impamyabumenyi muri iyi kaminuza muri Kanama 2026.
Didmus Barasa ni Umudepite uhagarariye Akarere ka Kimilili, kamwe mu turere icyenda tugize Intara ya Bungoma iherereye mu burengerazuba bwa Kenya.
Depite Didmus Barasa ahabwa impamyabumenyi y'ikirenga, PhD, muri Kanama 2026