Kuki uturere tw’Umujyi wa Kigali tutagaragara ku rutonde rw’abakandida mu Nama Njyanama?
Komisiyo y’Igihugu y’Amatora (NEC) yatangaje urutonde rw’agateganyo rw’abakandida mu Nama Njyanama z’Uturere, ariko uturere dutatu tugize Umujyi wa Kigali, ari two Gasabo, Kicukiro na Nyarugenge, ntitugaragaraho. Ibi bifitanye isano n’imiterere yihariye y’imiyoborere y’Umujyi wa Kigali, itandukanye n’iy’utundi turere 27 tugize igihugu.
Itegeko Nº 22/2019 ryo ku wa 29 Nyakanga 2019 rigenga Umujyi wa Kigali ryavuguruye imiterere y’imiyoborere yawo, rikuraho ubuzimagatozi n’ubwigenge mu micungire y’umutungo n’abakozi byari bifitwe n’uturere tuwugize. Umujyi wa Kigali ni wo ufite ubuzimagatozi n’ubwigenge mu miyoborere no mu micungire y’umutungo n’abakozi.
Ibi bisobanura ko Nyarugenge, Gasabo na Kicukiro bitagira Inama Njyanama zabyo nk’uko bimeze mu tundi turere 27. Ahubwo, bigengwa n’inzego z’ubuyobozi bw’Umujyi wa Kigali, ari na zo zifite inshingano zo gufata ibyemezo by’ingenzi birebana n’imiyoborere n’iterambere ryawo.
Inama Njyanama y’Umujyi wa Kigali igizwe n’abajyanama 12, barimo batandatu batorwa, babiri muri buri karere, umugabo n’umugore, hamwe n’abandi batandatu bashyirwaho n’Iteka rya Perezida nyuma yo kwemezwa n’Inama y’Abaminisitiri.
Iyi Nama Njyanama ifata ibyemezo ku ngamba z’iterambere ry’Umujyi wa Kigali, ingengo y’imari, ibikorwa remezo, imiturire n’ibindi bikorwa bigamije guteza imbere Umujyi.
Ku rwego rw’uturere tugize Kigali, imirimo y’ubuyobozi ishingiye ahanini ku gushyira mu bikorwa gahunda z’Umujyi no gutanga serivisi ku baturage. Utwo turere dufite inzego nshingwabikorwa, aho kugira Komite Nyobozi na Nama Njyanama nk’iz’utundi turere.
Ni yo mpamvu kutabona Nyarugenge, Gasabo na Kicukiro ku rutonde rw’abakandida mu Nama Njyanama z’Uturere bidaturuka ku kuba byaribagiranye, ahubwo bishingiye ku mategeko agenga imiterere y’ubuyobozi bw’Umujyi wa Kigali.