Museveni yagaragaje umuhungu we Muhoozi mu nyandiko ku buyobozi bwa Uganda, muri NRM havuka impaka
Perezida wa Uganda, Yoweri Museveni, yagaragaje umuhungu we Gen Muhoozi Kainerugaba mu nyandiko ivuga ku miyoborere n’ibiranga umuyobozi ukenewe, bituma havuka impaka mu ishyaka NRM zishingiye ku kuba yaba yatangiye gutegura uzamusimbura ku butegetsi.
Iyi nyandiko yagejejwe ku bagize Komite Nyobozi Nkuru (CEC) y’ishyaka National Resistance Movement (NRM), mu nama yabereye mu ngoro y’Umukuru w’Igihugu i Entebbe, ku wa Kabiri, tariki ya 27 Ukwakira 2026.
Iyo nama yari iyobowe na Museveni, usanzwe ari Perezida w’iri shyaka, akaba amaze kuyobora Uganda kuva mu 1986.
Amakuru yatanzwe n’abari muri iyo nama agaragaza ko Museveni yibanze ku biranga umuyobozi mwiza, birimo gushyigikira ubumwe bwa Afurika, kugira ubushobozi mu bya gisirikare no kurangwa n’ikinyabupfura.
Yavuze ko ibihugu byinshi byahuye n’ibibazo mu guhererekanya ubuyobozi bitewe no kudasuzuma ubushobozi bw’abategurwaga gufata inshingano, anagaragaza ko umwanzuro wa nyuma ugomba gufatwa n’ubwinshi bw’ababifitiye uburenganzira.
Mu nyandiko ye, Museveni yavuze ko umuhungu we Gen Muhoozi Kainerugaba, usanzwe ari Umugaba Mukuru w’Ingabo za Uganda, afite byinshi mu biranga umuyobozi.
Yagize ati: “Nk’umubyeyi wa Muhoozi, umuntu warwanye mu rugamba rwo guharanira impinduka kandi wamushishikarije kujya mu gisirikare, nzi ko yitwara neza cyane kuri byinshi muri ibyo bigenderwaho. Ndetse n’ubutumwa yandika ku mbuga nkoranyambaga, iyo mbonye umwanya wo kubusoma, buba buvuga kuri Afurika, Uganda n’ahazaza habyo.”
Museveni yasabye abayobozi ba NRM gusuzuma ubushobozi bwa Muhoozi hashingiwe ku ngingo yari yagaragaje.
Yagize ati: “Mukwiye rero kuganira mu buryo bweruye, mu rwego rubikwiye, ku bushobozi bwa Muhoozi mugendeye kuri ibyo bigenderwaho. Nimumara kunyurwa n’ibyo yakoze n’impamvu zibishimangira, muzarebe uko byashyirwa mu bikorwa.”
Amakuru yatangajwe na ChimpReports avuga ko iyo nyandiko inagaruka ku busabe bw’uko Muhoozi yayobora Uganda mu gihe cya 2031–2036, ariko ntiyemeza ko Museveni yiyemeje kuva ku butegetsi.
Ku wa Kabiri, tariki ya 27 Ukwakira 2026, Depite Daudi Kabanda, ushinzwe ibikorwa mu biro by’Umuyobozi wa Patriotic League of Uganda (PLU), yatangaje ko Museveni yashyigikiye Muhoozi muri iyo nama.
Icyakora, Perezida wa Komisiyo y’Amatora ya NRM, Dr Tanga Odoi, yahakanye ko ikibazo cyo gusimbura Museveni cyaganiriweho.
Yagize ati: “Ndi umwe mu bagize Komisiyo y’Amatora, kandi nitabiriye iyo nama kugeza irangiye. Ikibazo cy’uzasimbura Perezida nticyaganiriweho. Ahubwo Perezida Museveni yatanze inyandiko asaba gusobanura imiterere ya Patriotic League of Uganda, anagaragaza ko PLU atari ishyaka rya politiki.”
Amakuru atandukanye avuga ko Odoi yaba yarashyigikiye icyifuzo kijyanye na Muhoozi, bigaragaza ukudahuza kw’ibyatangajwe ku byabereye muri iyo nama.
Umunyamabanga Mukuru wa NRM, Richard Todwong, yavuze ko azagira icyo atangaza amaze kugisha inama abagize CEC, mu gihe Umuvugizi w’ishyaka, Emmanuel Dombo, yasabye abanyamakuru kubaza Todwong.
Nta tangazo ryemewe rya NRM cyangwa ry’Ibiro bya Perezida wa Uganda ryari ryashyizwe ahagaragara ryemeza ko Museveni yatanze izina ry’uzamusimbura.
Izi mpaka zije mu gihe abashyigikiye Muhoozi binyuze muri PLU bakomeje ibikorwa byo gushaka abamushyigikira mu gihugu, bitegura ko ashobora kwiyamamariza kuyobora Uganda mu 2031.
Ingingo ya 208 n’iya 209 z’Itegeko Nshinga rya Uganda zibuza abasirikare bakiri mu kazi kwishora mu bikorwa bya politiki bishingiye ku mashyaka, ibintu bikomeje kugira agaciro mu biganiro ku hazaza ha Muhoozi mu buyobozi bw’igihugu.