Mushikiwabo yabonye andi maboko mu rugendo rwo gushaka manda ya gatatu muri OIF
Umunyamabanga Mukuru w’Umuryango Mpuzamahanga w’Ibihugu bikoresha Igifaransa (OIF), Louise Mushikiwabo, yabonye andi maboko mu rugendo rwo gushaka manda ya gatatu, nyuma y’uko impuguke mu by’ubukungu yo muri Togo, Kako Nubukpo, itangaje ko imushyigikiye, ishimangira ko afite ubunararibonye n’ubushobozi bwo gukomeza kuyobora uyu muryango.
Kako Nubukpo, wahoze ashinzwe ubukungu n’ikoranabuhanga muri OIF, yagaragaje impamvu ashyigikiye Mushikiwabo mu nyandiko y’ibitekerezo yasohotse mu kinyamakuru Jeune Afrique ku wa 2 Ugushyingo 2026, mu gihe habura iminsi mike ngo habe amatora y’Umunyamabanga Mukuru w’uyu muryango.
Iyi mpuguke mu by’ubukungu yashimye impinduka Mushikiwabo yazanye mu miyoborere ya OIF kuva yatangira kuyobora uyu muryango muri Mutarama 2019, cyane cyane mu kunoza imicungire y’umutungo, kuvugurura imikorere y’inzego zawo no gushyira imbere ibikorwa bitanga umusaruro.
Nubukpo yagarutse ku gihe yakoraga muri OIF, by’umwihariko ku buyobozi bwa Michaëlle Jean, agaragaza ko uyu muryango wagiye uhura n’ibibazo by’imiyoborere n’imikoreshereze y’umutungo, ndetse n’imbogamizi zo guhuza imigambi yawo n’ibikorwa bigirira akamaro ibihugu biwugize.
Yavuze ko Mushikiwabo yazanye uburyo bushya bwo kuyobora bushingiye ku musaruro no gukoresha neza ubushobozi bw’umuryango, ibintu asanga byarafashije OIF kurushaho kunoza imikorere yayo.
Yashimye impinduka zakozwe mu miyoborere ya OIF
Mu byo Nubukpo yashingiyeho ashyigikira Mushikiwabo harimo amavugurura yakoze mu mikorere y’abakozi n’imicungire y’umutungo wa OIF.
Yagarutse ku ivugurura ryatumye abakozi bagera kuri 20 basezererwa, nyuma y’uko bigaragaye ko inshingano zabo zitari zigihuye n’icyerekezo gishya cy’umuryango, nk’uko abisobanura.
Nubukpo yemera ko ibi byemezo byateje kutishimira ubuyobozi bwa Mushikiwabo muri bamwe mu bakozi, ariko akavuga ko byari bikenewe kugira ngo umuryango urusheho gukora neza.
Yashimye kandi uburyo Mushikiwabo yashyize imbere ubufatanye mu bukungu, iterambere ry’ikoranabuhanga n’imikoranire hagati y’ibihugu bigize OIF.
Yamushyigikiye no ku bibazo bya dipolomasi
Kako Nubukpo yanagarutse ku banenga Mushikiwabo bashingiye ku kuba akomoka mu Rwanda, ndetse n’abavuga ko OIF itajya igaragaza ijwi rikomeye ku bibazo bya demokarasi n’imiyoborere mu bihugu biwugize.
Ku bijyanye n’igihugu Mushikiwabo akomokamo, Nubukpo yavuze ko atari impamvu ikwiye gushingirwaho mu gusuzuma ubushobozi bwe bwo kuyobora OIF, ahubwo hakwiye kurebwa ubunararibonye n’ibikorwa yakoze.
Yibukije ko Mushikiwabo yamaze imyaka igera ku icumi ari Minisitiri w’Ububanyi n’Amahanga w’u Rwanda, ibintu asanga byaramuhaye ubunararibonye mu mikoranire mpuzamahanga no gukemura ibibazo binyuze mu biganiro.
Ku birebana n’ibirego by’uko OIF itavuga cyane ku bibazo bya demokarasi, Nubukpo yasobanuye ko imikorere y’uyu muryango ishingira ku biganiro, ubwumvikane n’ubuhuza, aho gutangaza buri gihe ibitekerezo mu ruhame.
Yavuze ko kuba umuyobozi adahita atangaza icyo atekereza ku kibazo runaka bidasobanura ko atagikurikirana cyangwa ngo agishakire umuti.
Yatanze urugero rw’ibikorwa bya Mushikiwabo mu bihugu byahuye n’ibibazo by’umutekano n’amakimbirane, birimo Libani, agaragaza ko abona ibiganiro n’ubuhuza nk’uburyo bwo gushaka ibisubizo birambye.
Nubukpo yashimye kandi icyerekezo cya Mushikiwabo cyo guteza imbere inyungu za Afurika, anaharanira ubufatanye bwagutse hagati y’ibihugu bikoresha Igifaransa byo ku migabane itandukanye.
Mushikiwabo ahanganye n’abandi bakandida batatu
Ubu bushyigikire buje mu gihe Mushikiwabo yitegura guhatanira manda ya gatatu ku buyobozi bwa OIF, mu matora ateganyijwe ku wa 16 Ugushyingo 2026, mu Nama ya 20 y’Abakuru b’Ibihugu na za Guverinoma bigize uyu muryango, izabera i Phnom Penh muri Cambodge.
Mushikiwabo ahanganye n’abandi bakandida batatu, ari bo Juliana Amato Lumumba wo muri Repubulika Iharanira Demokarasi ya Congo, Coumba Bâ wo muri Mauritania na Dacian Cioloș wahoze ari Minisitiri w’Intebe wa Romania.
Aba bakandida bose uko ari bane bagejeje imigabo n’imigambi yabo ku bahagarariye ibihugu bigize OIF mu biganiro byabereye i Paris mu Bufaransa ku wa 30 Kamena 2026.
Mushikiwabo, watorewe bwa mbere kuyobora OIF mu 2018, akongera gutorerwa manda ya kabiri mu 2022, arashaka gukomeza kuyobora uyu muryango mu gihe cya 2027–2030.
Nubukpo yasabye ibihugu bya Afurika gushyigikira kandidatire ye, ashingiye ku bunararibonye bwe mu miyoborere no muri dipolomasi, ndetse n’icyerekezo cye ku hazaza h’umuryango.
Nubwo ubu bushyigikire bwiyongereye ku bwari busanzwe bugaragarizwa Mushikiwabo, uzegukana umwanya w’Umunyamabanga Mukuru wa OIF azagenwa n’abakuru b’ibihugu na za guverinoma bafite uburenganzira bwo gutora.
Impuguke mu by’ubukungu ukomoka muri Togo, Kako Nubukpo, yatangaje ko ashyigikiye Louise Mushikiwabo mu rugendo rwo gushaka manda ya gatatu ku buyobozi bwa OIF
Louise Mushikiwabo (hagati) ari kumwe na Perezida wa Arménie, Vahagn Khachaturyan, na Minisitiri w’Intebe Nikol Pashinyan, mu nama ya COP17 yabereye i Yerevan mu Ukwakira 2026